Policia e Tiranës kërkon rifillimin e hetimeve

Policia e Tiranës ka kërkuar rihapjen e dosjes së “21 janarit”, ndërkohë që nesër shënohen 10 vjet nga ngjarja e rëndë.

Pritet që kërkesa t’i kalojë tashmë Prokurorisë së Tiranës. Blutë kanë kërkuar që të rishihen kamerat e sigurisë, të ripyeten dëshmitarët, të afërmit e viktimave dhe ish-punonjës të Gardës.

Vitin e kaluar organi i akuzës pezulloi hetimet për njërin prej të vrarëve në bulevard, Aleks Nikën.

Sjellim në vëmendje që 4 protestues mbetën të vrarë si pasojë e protestës së dhunshme para Kryeministrisë në Bulevardin “Dëshmitarët e Kombit”.

Ziver Veizi, Faik Myrtaj, Hekuran Deda dhe Aleks Nika u vranë gjatë protestës së thirrur asokohe nga Partia Socialiste kundër Kryeministrit të kohës Sali Berisha dhe aleatit të tij në qeveri Ilir Meta.