Policia jep detajet e aksidentit të rëndë në Rrugën e Arbrit/ Kapet shoferi që përplasi për vdekje kalimtarin

Një aksident me pasojë vdekjen e një personi ka ndodhur këtë mbrëmje në Rrugën e Arbrit. Mësohet se viktima është shtetasi Rushit Rusi nga fshati Çerenec i Dibrës.

Aksidenti ka ndodhur pranë fshatit Gjoricë. Shoferi që ka përplasur me makinë kalimtarin dhe është larguar nga vendngjarja, por pak minuta më vonë policia ka mundur të bëjë shoqërimin e tij në Komisarit.

Policia ka mbërritur në vendngjarje dhe po punon për të zbardhur aksidentin tragjik me një viktimë.

Njoftimi i plotë: 

Shkaktoi aksident me pasojë vdekjen e 69-vjeçarit, shoqërohet në Komisariat drejtuesi i mjetit i cili pas aksidentit u largua nga vendi i ngjarjes.

Rreth orës 20.00, në vendin e quajtur Gjoricë, (në segmentin e rrugës së Arbërit që është akoma kantier ndërtimi) shtetasi N. D., duke drejtuar automjetin tip ‘Benz’, dyshohet se ka goditur shtetasin R. R., 69 vjeç, i cili për pasojë ka humbur jetën.

Shërbimet e Policisë pas ndjekjes dhe kontrollit të zonës, kanë gjetur dhe shoqëruar në Komisariatin e Policisë Bulqizë, drejtuesin e automjetit i cili pas aksidentit u largua nga vendi i ngjarjes.

Grupi hetimor vijon hetimet për zbardhjen e shkaqeve të plota të ngjarjes.