Presidenti Meta mbështet nismën e mbledhjes së ndihmave në mbështetje të popullit ukrainas

Presidenti Ilir Meta thotë se situata në Ukrainë është në një moment tepër kritik.

Në një postim në rrjetet sociale, kreu i shtetit tha se ka mirëpritur angazhimin e Kryqit të Kuq Shqiptar, për të nisur organizimin e mbledhjes së ndihmave në mbështetje të popullit të Ukrainës.

“U bëj thirrje të gjithë shoqërisë civile të ndjekin këtë nismë humanitare për të ofruar çdo mbështetje që meriton përpjekja e një populli që po lufton për të mbrojtur me çdo çmim lirinë e tij!”, shkruan kreu i shtetit.

POSTIMI I PLOTE

Situata në Ukrainë është në një moment tepër kritik.

Veçanërisht kritike paraqitet situata humanitare edhe për shkak të largimeve masive të qytetarëve nga zonat që po përballen me luftime tepër të ashpra.

Mirëprita angazhimin e Kryqit të Kuq Shqiptar, organizatës humanitare më të madhe në Shqipëri dhe që ka në misionin e veprimtarinë e saj ndihmën e personave në nevojë në konflikte të armatosura e situata të tjera kritike, për të nisur organizimin e mbledhjes së ndihmave në mbështetje të popullit të Ukrainës.

U bëj thirrje të gjithë shoqërisë civile të ndjekin këtë nismë humanitare për të ofruar çdo mbështetje që meriton përpjekja e një populli që po lufton për të mbrojtur me çdo çmim lirinë e tij!

NDAL LUFTËS NË UKRAINË!