Presidenti Meta: Urgjente çkapja e shtetit

Presidenti Ilir Meta ka komentuar të dhënat e raportit të fondacionit “Heritage”, sipas të cilit Shqipëria ka rënë 9 vende në lirinë ekonomike krahasuar me një vit më parë.

Sipas kreut të shtetit “kjo rrëshqitje e frikshme në pikiatë e lirisë ekonomike, është pasojë e drejtpërdrejtë e cenimit brutal të të drejtave të pronësisë dhe mosfunksionimit të sistemit gjyqësor”.

Meta thekson se është urgjente çkapja e shtetit, duke u shprehur se referendum i 25 prillit është një mundësi historike për të nxjerrë nga “intubimi” edhe lirinë ekonomike.

 Deklarata e plotë

Shqipëria, sipas raportit të fondacionit prestigjoz botëror “Heritage”, ka rënë nëntë vende më poshtë në renditjen për lirinë ekonomike, krahasuar me një vit më parë.

Kjo rrëshqitje e frikshme në pikiatë e lirisë ekonomike, është pasojë e drejtpërdrejtë e cenimit brutal të të drejtave të pronësisë dhe mosfunksionimit të sistemit gjyqësor.

Ky raport thellësisht negativ konfirmon qëndrimet e vazhdueshme publike, që kam shprehur edhe me dekrete, në mbrojtje të konkurrencës së lirë.

Ndaj është urgjente çkapja e shtetit, Kuvendit, Qeverisë dhe e pushtetit gjyqësor nga oligarkët dhe interesat okulte.

Referendumi i 25 prillit është një mundësi historike për të nxjerrë nga “intubimi” edhe lirinë ekonomike, krahas të gjitha lirive të tjera, që gëzojnë qytetarët në një vend plotësisht europian.