Profesor Fuga flet për letrën e dërguar Presidentit për projektligjin e Akademisë së Shkencave: ‘Besoj se nuk do të dekretohet'”

Në rubrikën “Opinion” në News24, Profesori dhe akademiku Artan Fuga ka rrëfyer detajet e letrës që i ka dërguar pak javë më parë Presidentit Bajram Begaj, lidhur me miratimin e projektligjit për Akademinë e Shkencave. Në letër, Fuga ka argumentuar se ky ligj, i cili zgjat mandatin e Skënder Gjinushit, nuk duhet të dekretohet nga Presidenti.

Fuga ka treguar se ende nuk ka marrë një përgjigje, por beson se letra e tij do të shqyrtohet me seriozitet nga juristët e presidencës. Ai ka shprehur bindjen se pas leximit të saj, pr/ligji nuk do të dekretohet.

Gjatë intervistës, Fuga ka theksuar se kjo çështje nuk është vetëm për Akademinë, por lidhet me funksionimin e Kuvendit dhe ligjbërjen në Shqipëri. Ai ka vënë në dukje disa shkelje të rregullave ligjore dhe procedurave gjatë trajtimit të ligjit në Kuvend, duke e konsideruar shkelje të kushtetutës dhe parimeve bazë të logjikës.

Profesori Fuga ka kritikuar se në relacionin për ndryshimin e ligjit nuk ka asnjë argumentim të qartë dhe se procedura në Kuvend nuk ka ndjekur rregullat e veta, duke futur ligjin në seancë jashtë axhendës dhe duke e miratuar në orët e mëngjesit. Ai ka shprehur shqetësimin e tij për shkeljen e ndarjes midis politikës dhe shkencës, duke thënë se nëse pushtetet nuk janë të ndara dhe nuk kontrollojnë njëri-tjetrin, shoqëria mbaron në kaos.

Fuga gjithashtu ka reaguar ndaj anëtarëve të Kryesisë së Kuvendit, të cilët votuan pro këtij ligji, duke treguar keqardhje për shkeljen e rregullave të konfliktit të interesave.

Profesori është i bindur se Presidenti nuk do ta dekretojë këtë ligj dhe tha se do të vijojë të luftojë për të çuar çështjen deri në Gjykatën Kushtetuese. Ai ka shprehur qëllimin e tij për të shpalosur idetë e veta për funksionimin e Akademisë së Shkencave në të ardhmen.