Prokuroria e Posaçme nuk pret më: Do bastisim zyrat për të marrë dokumentet

Pasi nuk ka marrë përgjigje në kërkesën e parë, burime për Report Tv thonë se SPAK i ka dërguar edhe një kërkesë tjetër Ministres.

SPAK i ka drejtuar këto 5 pyetje Ministres, ndërsa ende janë në pritje të një përgjigje zyrtare:

1- Çfarë procedure është ndjekur në tenderat e zhvilluar?

2 – Çfarë klasifikimi sekret dhe çfarë niveli sekret kanë tenderat e zhvilluara nga ky   institucion?

3 – Numrin e tenderave të zhvilluar me procedurë sekrete?

4 – Sa është vlera e tenderave me procedurë sekrete?

5 – Çfarë është blerë me këto tendera?

Hetuesit kanë thënë se nëse Ministria nuk do të kthejë një përgjigje në fillim të kësaj jave, ata do të zbarkojnë në Ministrinë e Shëndetësisë dhe do bastisin zyrat për të marrë dokumentet e kërkuara.

Ditën e djeshme kryedemokrati Basha denoncoi Ministren Manastirliu se i kishte djegur këto dokumente duke i vënë zjarrin Zyrës së Prokurimeve, por nuk mungoi edhe reagimi i ministres e cila tha se ky zjarr imagjinar është i pavërtet dhe tymi del nga koka e Bashës.

Tashmë pritet nëse do të ketë një përgjigje nga Ministria për pyetjet e SPAK, apo Prokuroria e Posaçme do të bastisë zyrat e ministrisë për të marrë dokumentet që i kërkon prej 10 ditësh.