Protesta/ Banorët e Zall Herr bllokojnë rrugët me gurë në shenjë proteste

Një herë tjetër, banorët e Zall Herrit janë hedhur në protestë, duke bllokuar rrugën ku kalojnë kamionë me inertë dhe automjete të tjera. Kjo është një reagim i fuqishëm ndaj çështjeve të infrastrukturës dhe mungesës së ujit të pijshëm në këtë njësi administrative.

Protestuesit kanë vendosur gurë të mëdhenj për të bllokuar rrugën. Ata besojnë se rruga është dëmtuar nga kamionët që punojnë në guroret e zonës dhe po kërkojnë zgjidhjen e problemit.

Në një deklaratë për mediat, një nga protestuesit ka thënë: “Deputeti ynë ka qenë këtu në maj për fushatë, por nuk flet për problemet tona. Kjo njësi administrative ka nevojë për ujë dhe rrugë, dy gjëra themelore. Problemi me ujin është i dukshëm, edhe pse sot nuk ka shi, uji është i turbullt. Kamionët janë ata që shkaktojnë këto probleme, dhe nuk ka pasur asnjë reagim. Vetëm deputeti i zonës ka ardhur për një takim me ne.”

Një banore e moshuar ka shtuar: “I bëjmë thirrje deputetit Xhemal Qefali të vijë këtu dhe të japë llogari, ose të lërë mandatin. Ne kemi votuar për ta dhe duam ndihmën e tij. Na ndihmoni!”

Kjo nuk është hera e parë që banorët e Zall Herrit dalin në protestë kundër mungesës së infrastrukturës dhe ujit të pijshëm. Ata vazhdojnë të kërkojnë zgjidhje për problemet e tyre që kanë zgjatur për një kohë të gjatë.