Protestuesit bllokojnë rrugën te Zogu i Zi, shoqërohen disa persona

Një protestë e zhvilluar sot në Tiranë ka sjellë vështirësi në qarkullim, pikërisht në ditën e parë të vitit të ri shkollor, kur rrugët e kryeqytetit janë përballur me një fluks të shtuar automjetesh.

Protestuesit janë mbledhur në zonën e Zogut të Zi, një prej nyjeve kryesore të qarkullimit në Tiranë, duke tentuar të bllokojnë lëvizjen e automjeteve. Situata ka krijuar vështirësi për drejtuesit e mjeteve që po kalonin në këtë aks.

Policia ka ndërhyrë menjëherë për të shmangur bllokimin e plotë të qarkullimit. Gjatë ndërhyrjes, disa prej protestuesve janë shoqëruar nga efektivët.

Aksioni i protestuesve është zhvilluar në një moment veçanërisht të ngarkuar për trafikun në kryeqytet. Nisja e vitit të ri shkollor ka rritur ndjeshëm numrin e automjeteve në rrugë, duke shkaktuar trafik të rënduar në disa prej akseve kryesore.

Përballë kësaj situate, forcat e policisë kanë ndërhyrë për të liruar nyjën e Zogut të Zi dhe për të garantuar vijimin e qarkullimit.

Ngjarja vjen në një ditë kur trafiku në Tiranë është ndër problematikat kryesore për qytetarët, ndërsa çdo bllokim në nyjet kryesore sjell pasoja të menjëhershme në lëvizjen në pjesë të tjera të kryeqytetit.