“Zare i Belindës”, deputeja-protestuesve: Keni nevojë për psikolog

Një përplasje verbale është shënuar sot para Kryesisë së Kuvendit, ku protestuesit i kanë dalë përpara deputetes së Partisë Socialiste, Kiduina Zakës, teksa kjo e fundit po largohej nga ambientet e Kuvendit.

Protestuesja Arvina Lleshi, së bashku me pjesëmarrës të tjerë në tubim, i është drejtuar deputetes socialiste të Fierit me akuza dhe thirrje kundërshtuese, duke e vënë përballë qëndrimeve të saj publike ndaj protestave që zhvillohen prej muajsh.

Në momentin kur deputetja është shfaqur në dalje të Kuvendit, protestuesit kanë nisur ta thërrasin “Hajdute!”, ndërsa i kanë kërkuar llogari për deklaratat dhe postimet e saj kundër protestave të zhvilluara nga qytetarët.

Gjatë përplasjes verbale, Arvina Lleshi i është drejtuar deputetes edhe me akuzën: “Ti je zare e Belindës”, duke e lidhur qëndrimin e saj politik me figurat e opozitës.

Nga ana tjetër, Kiduina Zaka ka reaguar e irrituar ndaj protestuesve, duke u sugjeruar atyre që t’u drejtohen psikologëve për të menaxhuar emocionet.

Përplasja ka ndodhur në një moment kur protesta vijon prej muajsh, ndërsa tensionet mes pjesëmarrësve në tubime dhe përfaqësuesve të mazhorancës janë shfaqur në disa raste edhe përpara institucioneve të shtetit.