PS-së kandidon Pjerin Ndreun për Bashkinë Lezhë/ Mesazhi për kampin e djathtë

Nga Lezha ku është takuar me strukturat e partisë, Ministri i Drejtësisë, Ulsi Manja ka dalë me një mesazh për opozitën.

Me anë të një postimi në rrjete sociale, Manja shkruan se kundërshtari politik është i lirë të përdorë të gjithë arsenalin në fushatë, por jo të fyejë ndjenjat qytetare dhe të përhapë frymë përçarëse me karakter krahinor.

“Lezha e 2 marsit 1444 është simboli i bashkimit dhe çdo qytetar që është bërë pjesë e kësaj zone fisnike për t’i dhënë më tepër asaj, është mirëpritur ndër dekada. Kundërshtari politik është i lirë të përdorë të gjithë arsenalin në fushatë, por jo të fyejë ndjenjat qytetare dhe të përhapë frymë përçarëse me karakter krahinor. Kjo, sepse përveçse është një retorikë e turpshme, është po aq edhe primitive.

Lezha e At Gjergj Fishtës i është përgjigjur njëherë e mirë kësaj mendësie kur në qindra vargje u është kënduar shqiptarëve që kanë dhënë për mbarë vendin, nga Oso Kuka tek Abdyl Frashëri. Pa dallim krahine”, shkruan Manja.

Në Lezhë nën singlën e PS-së, do të garojë edhe për një mandat tjetër  Pjerin Ndreu, për të cilin Manja bën thirrje për mbështetje.

“Në nderin e çdo qytetari pa dallim bindjesh politike është mbështetja për Pjerinin edhe për një mandat tjetër në krye të Bashkisë Lezhë. Pjerini na e ka zbardhur faqen me punët e mira për komunitetin ndaj edhe do të marrë besimin e zgjedhësve edhe për 4 vite të tjera”, shkruan më tej Manja