Përditësuar më 24 Nëntor 2024, 12:14

Zbulohet emri i dytë që qëlloi me thikë

Merr tjetër rrjedhë ngjarja sa i takon vrasjes me thikë të 14-vjeçarit Martin Cani dhe plagosjes me thikë të shokut të tij, Luisit.

Deri më tani është bërë e ditur se ata janë sulmuar me thikë nga Marjo Perlleshaj, i cili është vënë dhe nën arrest. Por babai i Luisit, djali i cili është plagosur me thikë dhe ndodhet në spital, ka treguar një tjetër version të ngjarjes.

Ai ka treguar se sherri ka nisur që të premten dhe Martini i ka rrëfyer djalit të tij se e kishte goditur një person më i madh në moshë. Sipas tij, Martini kishte dhe një shenjë goditje në buzë.

“Luisi mban mend se çfarë i ka thënë Martini, sepse është në një shkollë tjetër. Ai shkoi atje se ja kërkoi Martini. Ditën e premte janë takuar te shtëpia, se aty rrinë në lagje dhe i ka thënë, Luis unë kam pas një konflikt te shkolla sot, me dikë nga shokët e klasës paralele kemi bërë llafe, jemi goditur, ka ardhur një i madh dhe më ka goditur. Martini kishte një shenjë të premten te buza, se i çova unë në stërvitje. Të goditur. Dhe i thotë mos i trego babit tat dhe as unë timit, po hajde të hënën ta zgjidhim. Ditën e hënë në orën 13.20. Nuk e dimë ku e ka godit brenda apo jashtë shkollës”, ka rrëfyer ai.

Më pas ai ka treguar se ditën e hënë kur dhe ndodhi sulmi me thikë, kanë qenë dy persona dhe jo një. Madje ai ka nxjerrë dhe emrin e personit tjetër që ka ndihmuar Marjon.

“Po ta them me emër që personi i parë që e ka goditur Luisin me thikë pas shpine është Kledjon Begaj, bashkëmoshatar dhe shok i autorit tjetër. Ky Kledjoni e ka pasur thikën më të vogël thikën dhe këto dëshmi i dhashë sot te Drejtoria e Policisë. Kledjoni e ka goditur i pari në shpatull djalin tim, është më shkurtër si plagë dhe më e ngushtë, herën e dytë e ka goditur ky djali që është kapur Mario, dy herë dhe në fund pastaj e kanë goditur të dy se djali ka ikur i fundit pasi ka parë Martinin të rrëzuar në tokë”, tha babai i Luisit në emisionin Review në Euroneës Albania.

Pyetja që ngrihet është: Pse fshehu policia emrin e dytë? Sipas burimeve flitet se ai është djali i një efektivi policie, por do të shohim në vijim se çfarë qëndrimi do të mbajnë uniformat blu.