Pse Edi Rama takoi dje Saimir Tahirin në spitalin privat’, PD nxjerr detajet

‘Edi Rama takoi dje Saimir Tahirin në spitalin privat’, ky është informacioni më i ri bërë publik nga Partia Demokratike sot.
Sipas demokratëve, të dy ata, janë takuar për rreth 1 orë, në mëngjes.
‘Edi Rama duhet t’u tregojë shqiptarëve se përse e ka takuar dje Saimir Tahirin për më shumë se 1 orë në spitalin privat.

Kokat e vërteta të kokainës janë pranë tij. I ka shkaktuar një gjendje psikike për spital’, tha deputetja demokrate Dhurata Çupi, duke mos dhënë detaje se në cilin spital privat janë takuar.
Por një burim i tha ‘Hashtag.al’ se takimi mes tyre ka ndodhur te ‘Spitali Amerikan 3’, në orën 09:30.
Ditë më parë u kapën 613 kilogramë kokainë në Maminas të Durrësit. Ish-ministri i Brendshëm Saimir Tahiri është në hetim për trafik ndërkombëtar droge.

DETAJET NË DEKLARATËN E PD-së:
‘Edi Rama duhet t’u tregojë sa më shpejt shqiptarëve përse e ka takuar dje në mëngjes Saimir Tahirin në një nga spitalet private të Tiranës.
Edi Rama duhet të tregojë se për çfarë kanë biseduar për më shumë se 1 orë me ish-ministrin e tij të Brendshëm, i akuzuar për trafik droge.

Edi Rama duhet të flasë edhe nëse vëllai i tij fshihet pas kokainës kolumbiane dhe jo t’u shesë shqiptarëve 613 kilogramë kokaine për sapun.
Ka një arsye pse Edi Ramën e ka pushtuar një heshtje varri për kokainën, madje as nuk mburret më për kapjen e saj.
Arsyeja është se kokat e vërteta të kokainës janë pranë tij, në majat e politikës dhe në gjirin e familjes. Arsyeja është se garancia që ai dhe njerëzit e tij u dhanë kriminelëve të Klanit të Gjirit të Kolumbisë dështoi, sepse ia dogjën partnerët ndërkombëtare.

Ndaj Edi Rama sot ndjehet nën presion nga të gjitha anët, çfarë i ka shkatuar një gjendje të rënduar psiqike, për të cilën ai ka tre ditë që viziton spitalin.
Edi Rama gjendet mes dy zjarresh. Nga njëra anë ka presionin e trafikantëve, të cilëve u ka shkaktuar një dëm të madh dhe janë të rrezikuar. Nga ana tjetër, është nën presionin e partnerëve ndërkombëtarë. Edi Ramës i është bërë e qartë nga disa qeveri europiane se po nuk u kapën kokat e kokainës, nuk ka Shqipëri në Europë!

Edi Ramës i është bërë e qartë se, nëse Saimir Tahirit nuk i hiqet mbrojtja politike, nuk ka Shqipëri në Europë! Por Edi Rama nuk e dorëzon dot as Saimir Tahirin, as Olsi Ramën as Agron Xhafajn, se pastaj do t’i duhet të dorëzohet vetë.
Këtë fakt nuk mund ta fshehë as Edi Rama, as matrioshkat e tij, që me përralla me rubla ruse, përpiqen më kot të fshehin të vërtetat kriminale të kryeministrit të vendit.’