Qeveria miraton aderimin e Shqipërisë në Bordin e Paqes

Qeveria ka miratuar vendimin për aderimin e Shqipërisë në të ashtuquajturin “Bord i Paqes”, duke hedhur hapin e parë drejt anëtarësimit formal të vendit në këtë strukturë ndërkombëtare, pas ftesës së bërë nga presidenti i Shteteve të Bashkuara të Amerikës, Donald Trump.

Pas vendimit të ekzekutivit, procesi kalon në Kuvendin e Shqipërisë, i cili do të ketë fjalën përfundimtare mbi miratimin e aderimit.

Sipas parashikimeve, çështja pritet të shqyrtohet dhe të hidhet në votim të martën e ardhshme, në një seancë të posaçme parlamentare.

Pak ditë më parë, Shqipëria mori ftesën zyrtare nga presidenti Trump për t’u bërë pjesë e Bordit të Paqes për Gazën, një nismë që synon përfshirjen e disa shteteve në diskutime dhe vendimmarrje mbi proceset e paqes në rajon.

Vendimi ka ngjallur interes dhe debat politik, ndërsa pritet që diskutimet në Kuvend të shoqërohen me qëndrime të ndryshme nga mazhoranca dhe opozita.