Qytetarët vendosin lule në vendin ku humbi jetën 6-vjeçari në Shëngjin! Dëshmitari: Rruga nuk ka vija të bardha

Një ditë pas aksidentit tragjik ku humbi jetën 6-vjeçari në Shëngjin, qytetarë të shumtë dhe familjarë kanë vendosur lule në kujtim të të miturit.

Mësohet se gjatë sezonit turistik, zona është e populluar dhe incidentet janë të vazhdueshme. Në këtë rrugë mungojnë dhe vizat e bardha për kalimin e këmbësorëve.

“Jam banor i kësaj lagjeje, situata është shumë e keqe në këtë rrugë, kalojnë makinat me shumë shpejtësi, s’ka barriera, s’ka vija të bardha, ne kemi fëmijë, unë dje sapo kalova me fëmijët e mi, hyra të dyqani, ndjeva një krismë, jemi shumë të tronditur prej kësaj ngjarjeje, kur kam parë fëmijën e vet nuk di se çfarë të them nëna dhe babai i vet duke ulëritur duke bërtitur, gjendja është tepër e rënduar, s’kam arritur…policia ka dhe nuk e di pse dje nuk kishte polic, dje se di pse nuk ka pasur. Në fund të fundit, faji nuk është i policisë, është faji i Bashkisë, apo i atyre që marrin taksat”, tha një dëshmitar.

Aksidenti i rëndë ndodhi mëngjesin e djeshëm (18 gusht) në qendër të qytetit të Shëngjinit. Një furgon i cili drejtohej nga Shtefjen Prenga ka përplasur 6-vjeçarin i cili ndërroi jetë në spital.

6-vjeçari ishte krah familjes së tij me origjinë nga Burreli kur për një moment është shkëputur nga prindërit, duke përfunduar nën rrotat e furgonit.

Ndërkohë ditën e sotme, policia e Lezhës njoftoi se ka arrestuar drejtuesin e furgonit që shkaktoi aksidentin 56-vjeçarin Sh Prenga.

Nëna e të miturit 6-vjeçar ka publikuar foton e të birit në rrjete sociale ku i ka bërë dhe një dedikim rrënqethës.