Rama fillon sulmet ndaj partive të reja

Nuk i dalin llogaritë në sondazhe

Kryeministri Edi Rama si rrallë herë ka shafaqur ditën e sotme në rubrikën e tij në rrjetet sociale “SY m’SY”, edhe frikën për partitë e reja që po përgatiten seriozisht të hyjnë në skenën politike shqiptare.

Duke parë edhe sondazhet e fundit në televizionet shqiptare ku partia e Shehajt, Lapajt dhe Qorit janë në garë për të hyrë në Kuvend, ai ka nisur edhe sulmet e para të drejtpërdrejta ndaj tyre, që deri sot i ironizonte ose nuk i konsideronte fare.

Sot kreu i PS, që është konsumuar prej 12 vitesh në pushtet, i cilësoi këto parti të reja si “shëmbëlltyra që kërkojnë të hyjnë në valle dhe pastaj bëhen grabitqare”.

“Kandidati më i ri dhe më i vjetër këtu jam unë, në kuptimin e energjisë. Në listat e PS-së gjen më të rinjtë dhe ata me eksperiencë. “Duhet një parti e re?” imitacione të një partie që ishte e treta dhe e vërteta deri dje që u bë barra dhe halli i shqiptarëve, për këto nuk ka nevojë Shqipëria, pasi janë vetëm shëmbëlltyre që kërkojnë të hyjnë në valle dhe pastaj bëhen grabitqare”, u shpreh Rama.

Ai u shpreh se është “kandidati më i ri dhe më i vjetër”, duke iu referuar energjisë dhe eksperiencës që sipas tij bashkohen në listat e Partisë Socialiste.

“Duhet një parti e re?” – citoi Rama një komentues, duke shtuar se Shqipëria nuk ka nevojë për “imitacione të një partie që deri dje ishte e treta e vërteta, e sot është bërë barrë dhe hall”.

Prej disa muajsh në Shqipëri ka nisur të ndihet një rritje e ndjeshme e interesit publik ndaj partive të reja politike, një zhvillim që lidhet me pakënaqësinë e qytetarëve ndaj partisë në pushtet dhe Partisë Demokratike.

Në sfondin e një krize të gjatë besimi në klasën politike dhe mungesës së reformave të ndjeshme, qytetarët veçanërisht të rinjtë dhe diaspora po shohin tek partitë e reja një mundësi për ndryshim dhe përfaqësim ndryshe.

Ky shqetësim i Ramës është pasqyruar edhe në sondazhet e fundit të publikuara nga disa televizione kombëtare, ku partitë e reja kanë arritur përqindje të konsiderueshme mbështetjeje, sidomos në qarkun e Tiranës.

Kryeministri Edi Rama i është  përgjigjur akuzave të ngritura nga kreu i Partisë Demokratike, Sali Berisha, gjatë Kongresit të Partive Popullore Europiane (PPE) të mbajtur në Spanjë.

Në fjalën e tij, Rama ironizoi pjesëmarrjen e Berishës në kongresin e PPE, duke e quajtur atë një “mbledhje të partive simotra të kënetës”, ndërsa akuzat për blerje votash, punësime elektorale dhe abuzime me pushtetin i cilësoi si “fletërrufe të zakonshme që qarkullojnë pas çdo humbjeje”.

“Dje ra boria e parë e humbjes, në një mbledhje diku në Spanjë… Këneta kaloi nëpër tavolina një fletërrufe dhe aty nisi avazi: blerje votash me lekë dhe kanabis, punësime elektorale, favorizime, kërcënime ndaj kandidatëve të opozitës – të gjitha broçkulla të stërpërsëritura”, u shpreh Rama.

Ai theksoi se çdo denoncim duhet të trajtohet nga SPAK, struktura e posaçme antikorrupsion, dhe akuzoi opozitën se përpiqet të ushqejë presion publik mbi prokurorët për të prodhuar hetime të detyruara.

Kreu i qeverisë komentoi edhe kontratën e lobimit të PD-së me vlerë 6 milionë dollarë, duke thënë se “7×7 nuk bëjnë 6 milionë për ne, por për ata që pinë ujë këneta, mund të bëjnë edhe 6 miliardë”.

“Del me paturpësi edhe ndonjë kukumjaçkë e kënetës dhe thotë: ‘e mo s’ka gjë, se aq bën një verë që pi Edi Rama’”, shtoi kryeministri, duke ironizuar komentet e opozitës në rrjete sociale.