Rama inspekton aksin Thumanë-Kashar: Pa zgjidhje problemet e banorëve që prek rruga e re

Kryeministri Edi Rama dhe zv. kryeministrja Belinda Balluku kanë bërë inspektime në aksin Thumanë-Kashar, që është pjesë e Korridorit Blu dhe një nga rrugët që lidh veriun me jugun.

Rama dhe Balluku kanë njoftuar se 40% e punimeve në këtë aks janë përfunduar.

Sipas informacioneve të disponueshme, kjo rrugë do të jetë e shpejtë dhe do të përmbushë të gjitha standardet e sigurisë rrugore.

Përveç kësaj, janë parashikuar edhe vepra të tjera si mbikalime, 11 ura, 12 nënkalime dhe kryqëzime, si dhe rrugë aksesi për qytetarët.

Ndërtimi i rrugës me probleme që në fillim

Ndërtimi për aksin Thumanë-Kashar nisi pa leje, kompania ‘Gener 2’ filloi punën që me 20 nëntor, leja e zhvillimit iu dha shumë kohë më vonë.

Segmenti Thumanë-Kashar

Kompania ‘Gener 2’ i ka filluar punimet për aksin Thumanë-Kashar ende pa marrë lejen zhvillimore nga Këshilli Kombëtar i Territorit, i cili duhet ta pajisë kompaninë me dokumentin që përcakton kushtet zhvillimore dhe që shërben si një leje ndërtimi.Ndërtimi i këtij aksi është përballur me kundërshti nga banorët e zonës, të cilët kanë organizuar protesta të shpeshta. Madje, banorët kanë shprehur shqetësimin se kompania ka filluar ndërtimin pa leje.

Banorët  kanë  protestuar prej muajsh duke u ankuar se  firma ndërtuese u kishte ofruar negociata, duke u bërë me dije se do të kishte edhe rrugë dytësore për projektin dhe se nuk do të izoloheshin nga ndërtimi i aksit Thumanë-Kashar. Por ajo çfarë banorët, kërkojnë kryesisht është vlerësimi i tokave dhe banesave të tyre me çmim tregu.

Në këtë projekt me koncension preken rreth 30 hektarë toke private.