Rama ironi me akuzat politike: Sa keq që nuk gjendet vaksina e ‘dëshpërimit të opozitës’

“Akuzave politike nuk kemi çfarë u bëjmë. Edhe COVID-it iu gjet vaksina e imunizimit të cilën shpresoj që ta fillojmë ta injektojmë nisur nga mjekët dhe infermierët para afatit që kemi deklaruar, ndërsa vaksinës së dëshpërimit të opozitës nuk i është gjetur formula. Për shkak të dëshpërimit ata kapen pas çdo mundësie iluzore dhe natyrisht ndaj çdo fakteqësie natyrorre për të bërë politikë.Ne do të vazhdojmë të bëjmë punën tonë. Duke bërë më të mirën, siç të gjithë në këtë moment të vështirë kanë bërë dhë po bëjnë më të mirën. Ne kemi një protokoll standard për Emergjencat Civile, nivelet e gatishmërisë, ngritjen e strukturave në territore, të gjitha këto janë zbatuar”, deklaroi Rama.

Kreu i qeverisë theksoi faktin që deri më tani s’ka asnjë dëm në jetë njerëzore, ndërsa i konsideroi si minimale dëmet në banesa.

“Situata nuk ka si të jetë e pëlqyeshme në ato zona ku reshjet kanë qenë intensive. Falë gjithë punës së bërë ditë për ditë dhe vit pas viti, falë infrastrukturës së kullimit e kapaciteteve mbrojtëse, sot me këtë sasi reshjesh kemi një gjendje shumë më të pranueshme dhe absolutisht nën kontroll, krahasuar nëse do të ishim si në ato vite jo shumë të largëta kur bëhej hataja! Nga pikëpamja e jetëve njerëzore s’ka asnjë dëm. Nga pikëpamja e banesave dëmet janë minimale”, u shpreh kreu i qeverisë.

Pak para mbledhjes së Komitetit Ndërministror pati një reagim edhe nga presidenti Meta që e konsideroi si papërgjegjshmëri ekstreme dhe të dënueshme ligjërisht faktin që sipas tij institucionet shtetërore nuk po e marrin seriozisht alarmin e ngritur nga IGJEUM  mbi rrezikun e përmbytjeve në vend.