Rama: ”Lulzim Basha është një shalqi i papjekur, një kungull fare nga truri”

Gjatë dy ditëve të fundit “retorika e butë”, që aplikoi Lulzim Basha ndaj kryeministrit Rama që pas marrëveshjes së 17 Majit është ashpërsuar dukshëm. Kështu Basha paralelisht me shpalosje e programit ekonomik gjatë takimeve përmbyllëse elektorale, u është rikthyer akuzave të ashpra të qeverisjes 4-vjeçare të Edi Ramës. Ai ka nxjerr nga arkiva e `Çadrës` ligjërimin e tij të fortë denoncues, për kanabizimin e vendit, koncesionet, politikën e investimeve-fasadë, dështimin e reformës në arsim dhe atë të “shëndetësisë falas”.

Kjo kthesë e papritur e Bashës në këto ditë të fundit të fushatës, duket se e ka zënë në befasi Edi Ramën, i cili deri më tani është mjaftuar vetëm me batuta e improvizime qesharake, për gjumin e veshjen e kreut të opozitës. Nga ana tjetër ai duket hapur që është i shqetësuar, pasi Basha nuk po ndjek më me ashpërsinë e parë në planin e tij të vetëm elektoral, atë të denoncimin e LSI-së, si e keqja më e madhe e këtij vendi, duke justifikuar kështu dështimet e Rilindjes së tij.

Pikërisht në këtë situatë, sot nga Paskuqani Rama nga batuta përkëdhelëse dhe tallëse ndaj Bashës, ka kaluar në fyerje të rënda personale.

”Lulzim Basha është një shalqi i papjekur, një kungull fare nga truri”, ka deklaruar ai me nerv.