Rama ndan pamjet e stadiumit të ri që do ndërtohet në Kamëz

Një stadium i ri futbolli po ndërtohet në zonën e Kamzës, konkretisht në Valias. Lajmin e ka bërë të ditur Kryeministri Edi Rama përmes një postimi në Facebook, duke publikuar edhe pamje nga kantieri i punimeve.

Sipas Ramës, stadiumi po ndërtohet në bashkëpunim me Federatën Shqiptare të Futbollit dhe do të përmbushë standardet ndërkombëtare të IFAB/FIFA. Fusha sportive do të ketë një sipërfaqe prej 8.030 m², ndërsa kapaciteti i stadiumit parashikohet për 3.000 tifozë.

“MIRËMËNGJES dhe me këto pamje nga puna për stadiumin që po ndërtohet në Kamzë, Valias, sipas standardeve IFAB/FIFA… ju uroj një javë të mbarë”, shkroi Rama në postim.

Ky është një tjetër investim sportiv që synon të zgjerojë infrastrukturën e futbollit në vend dhe të krijojë kushte më të mira për zhvillimin e ndeshjeve në nivele lokale e kombëtare.