Këlliçi akuza të forta drejt qeverisë

Nëpërmjet një reagimi në rrjetet sociale, Belind Këlliçi ka akuzuar qeverinë dhe kryeministrin Edi Rama për braktisje totale të fermerëve, duke e cilësuar sjelljen e tij si arrogante dhe përçmuese ndaj qytetarëve që përballen me vështirësi reale ekonomike.

Sipas Këlliçit, ndërsa fermerët përballen me përmbytje, mungesë subvencionesh dhe pamundësi për të shitur prodhimet, kryeministri shfaqet i shkëputur nga realiteti, duke jetuar në luks ekstrem dhe duke reaguar me forcë ndaj çdo zëri kritik.

Reagimi i tij vjen pas takimit të zhvilluar në Divjakë, ku Rama u përfshi në një moment tensioni me një fermer, i cili tentoi të shprehte shqetësimet e tij, por u ndërpre. Episodi ka nxitur reagime të shumta në opinionin publik dhe në politikë.

Në deklaratën e tij, Këlliçi e lidh këtë sjellje me, sipas tij, dështimin e qeverisë në menaxhimin e fondeve për bujqësinë dhe bllokimin e ndihmës nga Bashkimi Evropian.

REAGIMI:

Kryeministri që pi verë 33 mijë euro shishja, i tregon vendin fermerit në Divjakë!

Edi Rama i salloneve që shijon verë 33 mijë euro shishja, që ka avion privat, kopsht personal në zyrë që ka kushtuar 4 milionë euro nga taksat tona, e sheh ndeshjet e NBA në rreshtin e VIP ku një biletë kushton 25 mijë dollarë, i tregoi sot muskujt një fermeri të përmbytur, pa mbështetje, pa mundësi për të shtuar prodhimin, as për ta shitur atë.

Pasi u premtoi se do të jenë më mirë në vitin 2040, Edi Rama i talli fermerët dhe në fund nuk i la as të flisnin.

Atij që guxoi të ngrinte zërin, i tregoi forcën!

Kjo kur i ka penalizuar me ngrirjen e 120 mln euro të BE, pasi qeverisja e tij ende nuk tregon se ku i çoi 30 mln euro të vjedhura nga programi IPARD.

Shqipëria është kudo në çdo sektor, si pamja sot në Divjakë.

Njerëzit kanë halle, ndërkohë kryeministri u tregon përralla dhe nuk i lë as të flasin.

Ndaj zgjidhja është vetëm një. Sheshi, protesta, revolta deri në largimin e Edi Ramës.

Fermeri që tallet nga kryeministri, e ka vendin e tij, të drejten e tij, sovranitetin e tij në Bulevard.

Aty do degjohet zëri i tij, do apo nuk do Edi Rama.