Rama reagon për tensionet në veri të Kosovës

Kryeministri Edi Rama ka reaguar për situatën ne Kosovë.

Përmes një postimi në rrjetet sociale, kryeministri shprehet se sulmet mbi EULEX janë të dënueshme dhe se rishfaqja e barrikadave bie ndesh me çdo ligj.

Rama vijon më tej duke i bërë thirrje Begradit që të ushtrojnë ndikimin e tyre tek serbët e Veriut të Kosovës, pasi veprimet e tyre nuk duhen justifikuar, cilido qoftë shkaku.

‘Sulmet mbi @EULEXKosovo janë të dënueshme pa asnjë ekuivok ashtu siç është i dënueshëm çdo akt dhune ndaj policisë së Kosovës. Rishfaqja e barrikadave në Veri të Kosovës, bie ndesh me çdo ligj e çdo frymë dialogu e jo vetëm nuk zgjidh asgjë, po përkundrazi komplikon më tej çdo gjë!

Shtyrja e votimeve nga ana e Presidentes së Republikës së Kosovës është një sinjal kuptimplotë, të cilit autoritetet e larta të Beogradit duhet t’i përgjigjen me të njëjtën frymë dhe ndjenjë përgjegjësie, për moslejimin e përshkallëzimeve të mëtejshme të akteve destabilizuese!

Beogradi duhet të ushtrojë ndikimin e vet mbi serbët e Veriut të Kosovës, pa i justifikuar assesi veprimet e tyre cilatdoqofshin arsyet! Arsyet diskutohen nuk përdoren si armë kundër policisë e si barrikada kundër rendit ligjor.BE-ja duhet të thërrasë urgjent tryezën e dialogut.’- shkruan Rama