Rama takon Erdoganin. Ja çfarë diskutuan

Përditësuar më 9 July 2017, 22:24

Kryeministri Edi Rama, ka takuar sot në Stamboll presidentin e Turqisë, Rexhep Taip Erdogan. Ka qenë vetë kreu i qeverisë shqiptare ai i cili ka njoftuar takimin mes tij dhe Erdogan.

Me anë të një statusi në Facebook, Rama ka theksuar se gjatë bisedës me presidentin turk u diskutuan marrëveshjet mbi projektet e përbashkëta në Shqipëri, ku një ndër to është aeroporti i Vlorës.

Rama ndodhet në Stamboll, ku do të marrë pjesë ditën e hënë në Kongresin Botëror të naftës.

Ja postimi i Ramës në Facebook:

Në Stamboll për Kongresin Botëror të Naftës nesër. Sot në rezidencën e Presidentit Erdogan, ku sapo përfundoi takimi prej 90 minutash, mbi projektet e përbashkëta. Progres i qenësishëm për aeroportin e Vlorës dhe linjën ajrore shqiptare, me asistencën logjistike e teknike të Turkish Airlines??????????????????

Ja çfarë ndodhte në Stamboll gjatë kohës që Rama takohej me Erdogan

Ndërkohë, e diela ishte një ditë e rëndësishme për Turqinë, pasi sipas “BBC” dhjetëra mijëra persona u mblodhën në protestën më të madhe kundër qeverisë së Presidentit turk që prej protestave të Parkut Gezi, katër vite më parë.

Mitingu shënoi edhe fundin e 450 kilometrave rrugë në këmbë që bëri lideri i opozitës turke, Kryetari i Partisë Popullore Republikane, Kemal Kilicdaroglu.  Rrugëtimi i tij në këmbë “për drejtësi” që nisi nga kryeqyteti Ankara për në Stamboll zgjati 25 ditë.

Dhjetëra mijëra personat që u mblodhën në sheshin në Maltepe protestuan kundër pushimeve masive nga puna dhe burgosjeve që pasuan grushtin e dështuar të shtetit vitin e kaluar, raporton “BBC”, sipas të cilës, Erdogan i ka akuzuar marshuesit për mbështetje të terrorizmit.

Lideri i opozitës turke e quajti marshimin dhe protestën e sotme “një lindje të re”.

“Askush nuk duhet të mendojë se ky marshim është i fundit. Është hapi i parë”, tha Kiliçdaroglu, i cili nisi marshimin pasi një prej deputetëve të tij, Enis Berberoglu, u arrestua dhe u burgos sepse kishte publikuar dokumente që pretendonin se qeveria turke armatoste xhihadistët në Siri. Këto akuza mohohen nga deputeti opozitar.

“Ne marshuam për drejtësi, ne marshuam për të drejtat e njerëzve të shtypur, për deputetët të burg dhe për gazetarët e arrestuar. Ne marshuam sepse sistemi i drejtësisë është nën monopolin politik , tha ai teksa fliste para mbështetësve.