Rasti i rëndë i braktisjes së foshnjës, reagon Balla: Prindërit e papërgjegjshëm të vendosen para drejtësisë!

Ministri i Brendshëm, Taulant Balla, ka reaguar në lidhje me rastin e rëndë të gjetjes së foshnjës së braktisur në bodrumin e një pallati në Tiranë.

Balla shkruan se, foshnja po lufton për jetën dhe se ndodhet nën kujdesin e mjekëve në Spitalin Obstetrik-Gjinekologjik “Koço Gliozheni”, ndërsa kërkon që prindërit të vihen para përgjegjësisë.

“Prej mesditës së sotme një foshnje e braktisur në zonën e Yzberishtit në Tiranë, po lufton për jetën, ndërsa u dërgua në spital me urgjencë nga një patrullë e Policisë së Tiranës. I falenderoj mjekët e Spitalit Obstetrik-Gjinekologjik “Koço Gliozheni” për kujdesin e tyre. I kam kërkuar Policisë së Shtetit të identifikojë me patjetër prindërit e papërgjegjshëm dhe vendosjen e tyre para drejtësisë”, shkruan Balla.

Kujtojmë se pak më herët është ndaluar  nëna e foshnjës, një 29-vjeçare nga Pgradeci me iniciale E. I.

Ndërkohë, mësohet se aktualisht ajo po merret në pyetje nga policia për të dhënë shpjegime per ngjarjen.

Kujtojmë se foshnja u gjet paraditen e sotme, nga një banor i zonës i cili kishte dëgjuar të qarat.

Foshnja, e cila u dërgua menjëherë në spital, u gjet e mbështjellë me një batanije në një divan të vjetër.