Rasti Dogjani, dëshmi e dështimit të ILDKP përballë milionerëve në Parlament.

Përditësuar më 4 Dhjetor 2024, 00:53

Prokuroria e Posaçme Kundër Korrupsionit dhe Krimit të Organizuar (SPAK) ka çuar për gjykim deputetin e Partisë Demokratike, Asllan Dogjani, i akuzuar për fshehje të pasurisë. Një rast i cili vë në dukje jo vetëm korrupsionin individual, por edhe dështimin sistematik të Inspektoratit të Lartë të Deklarimit dhe Kontrollit të Pasurive (ILDKP).

Sipas hetimeve, Dogjani ka raportuar në deklaratën e tij të interesave private pranë ILDKP-së se kishte përfituar një apartament prej 128.4 m² në Tiranë, në këmbim të konsulencave juridike për një kompani ndërtimi. Por hetimet e SPAK zbuluan një skemë të ndryshme: apartamenti ishte blerë me pagesa “cash” prej 121,980 euro, të cilat ishin fshehur përmes manipulimit të kontratave.

ILDKP, Një Institucion i Paefektshëm

Në thelb të kësaj çështjeje qëndron mosfunksionimi i ILDKP-së, institucioni që duhet të jetë roja e parë ndaj korrupsionit. ILDKP, i financuar me taksat e shqiptarëve, ka dështuar të identifikojë dhe hetojë raste flagrante të fshehjes së pasurisë nga politikanët e rangut të lartë.

Në vend që të zbulojë shkelje të rënda, ILDKP merret me gjobitjen e individëve për vonesa në deklaratat vjetore. Rasti i Dogjanit, i cili u zbulua vetëm pas sinjalizimit të një qytetari, tregon qartë se ILDKP nuk ka bërë as verifikimin më bazik të kontratave të deklaruara nga zyrtarët.

Pasuria e Paprekshme e Politikanëve

Dogjani nuk është i vetmi në radarët e SPAK. Të tjera figura politike, përfshirë deputetët Flamur Noka dhe Luan Baçi, si dhe disa ministra dhe kryebashkiakë, po hetohen për pasuri të pajustifikueshme. Ndërkohë, ILDKP ka qëndruar në heshtje edhe për raste më flagrante si deklaratat e vilave dhe aseteve të familjes Meta-Malltezi.

Nga politikanë që në fillimet e karrierës deklaronin apartamente modeste dhe makina të thjeshta, sot kemi vila luksoze dhe makina milionëshe. Dhe ILDKP nuk ka lëvizur as gishtin për të hetuar burimin e këtyre pasurive.

SPAK në Skenë: Shpresa e Fundit?

Burimet tregojnë se SPAK ka tërhequr mbi 40 dosje nga ILDKP për verifikim. Kjo sugjeron një valë të re hetimesh që mund të tronditin elitën politike. Por kjo është një kambanë alarmi për ILDKP-në, e cila ka dështuar të justifikojë ekzistencën e saj si një institucion mbikëqyrës.

Nëse SPAK vazhdon të zbulojë raste të fshehjes së pasurisë që ILDKP ka neglizhuar, atëherë roli i këtij të fundit në luftën kundër korrupsionit duhet të vihet seriozisht në diskutim. Shqiptarët nuk mund të përballojnë një tjetër institucion të dështuar që mbyll sytë përballë “sheikëve” të politikës.