Mjeku dhe rektori i Univeristetit të Mjekësisë Arben Gjata u bën thirrje gjithë studentëve të këtij Univeristeti që të bëhen pjesë e apelit publik të ministres Manastirliu, për të ndihmuar vendin në këtë situatë të vështirë.
Gjata apelon studentët që kudo që të jenë, të veshin bluzën e bardhë dhe të bëhen pjesë e ekipeve të mjekëve, infermierëve, farmacistëve e të gjithë personave që “i janë vënë përballë betejës me koronavirusin.”
“Në këtë apel që të drejtohet ty, ti nuk je më një student në Fakultetin e Mjekësisë, në Fakultetin e Infermierisë ,të Farmacisë apo të Shëndetit Publik. Ti je koleg. Nuk je kolegu im. Nuk je as kolegu i pedagogëve të tu. Je kolegu i jetës së çdo shqiptari”, shkruan Gjata.
SHKRIMI I PLOTË I ARBEN GJATËS:
I dashur student,
Në këtë apel që të drejtohet ty, ti nuk je më një student në Fakultetin e Mjekësisë, në Fakultetin e Infermierisë ,të Farmacisë apo të Shëndetit Publik.
Ti je koleg. Nuk je kolegu im. Nuk je as kolegu i pedagogëve të tu.
Je kolegu i jetës së çdo shqiptari.
Sot më shumë se kurrë, sytë e çdo shqiptari janë kthyer drejt nesh.
Sot më shumë se kurrë, jemi përgjegjës për të nesërmen.
E nesërmja je ti!
Ke në dorë ta mjekosh të nesërmen, me praninë tënde!
Kudo qofsh, vishe bluzën e bardhë dhe eja!
Eja, të luftojmë së bashku!
Eja, të lodhemi së bashku!
Eja, t’i këmbejmë turnet së bashku!
Eja, të themi që ia dolëm së bashku!
Sinqerisht
Arben Gjata
