Tendencë e re e emigracionit?

Publik.al | 20 maj 2025

Numri i shtetasve shqiptarë që kërkojnë mbrojtje të përkohshme në vendet e Bashkimit Europian ka shënuar një rënie të ndjeshme në fillim të këtij viti, duke konfirmuar një prirje të qëndrueshme që prej vitit 2022.

Sipas të dhënave më të fundit nga Eurostat, në periudhën janar-shkurt 2025, janë regjistruar gjithsej 980 aplikime për azil nga qytetarë shqiptarë në një nga vendet e BE-së. Kjo përfaqëson një rënie prej 19.5% krahasuar me të njëjtën periudhë të vitit të kaluar dhe është niveli më i ulët që nga viti 2021 – kur kufizimet pandemike kishin reduktuar në minimum lëvizjen ndërkombëtare.

Pas një kulmi të ri të arritur në vitin 2022, aplikimet për azil nga Shqipëria kanë ndjekur një trajektore të qartë rënëse, duke reflektuar ndoshta një ndryshim të qasjeve migratore dhe një kalim drejt emigracionit të rregullt, përmes kontratave pune ose bashkimit familjar. Megjithatë, ekspertët paralajmërojnë se shifrat e azilit nuk përfaqësojnë tërësisht fluksin real të largimeve.

Franca dhe Gjermania mbeten dy destinacionet më të preferuara për shqiptarët që kërkojnë azil, megjithëse të dyja vendet kanë shënuar ulje të ndjeshme në numrin e aplikimeve gjatë dy muajve të parë të këtij viti.

Europa – Një rënie e përgjithshme e kërkesave për azil

Në shkallë më të gjerë, fenomeni i azilkërkuesve jo vetëm nga Shqipëria por nga vende të ndryshme jashtë BE-së ka pësuar një tkurrje të konsiderueshme.

Vetëm në shkurt 2025, rreth 59 mijë qytetarë jo të BE-së kanë aplikuar për herë të parë për mbrojtje ndërkombëtare në BE, një rënie me 23% krahasuar me shkurtin 2024 dhe 12% më pak se në janar 2025. Ndërkohë, janë regjistruar 7 630 aplikime të përsëritura, duke shënuar një rritje të lehtë në krahasim me një vit më parë, por përsëri në rënie nga muaji paraprak.

Venezuelianët kryesojnë fluksin, shqiptarët në rënie

Grupi më i madh i aplikantëve për azil në BE vazhdon të jetë ai nga Venezuelë (8 300 aplikime në shkurt), i ndjekur nga afganët (5 610) dhe sirianët (4 630), që historikisht kanë dominuar statistikat për shkak të krizave të gjata politike dhe humanitare në vendet e tyre.

Spanja, Gjermania, Franca dhe Italia mbajnë peshën më të madhe të këtij fluksi, duke përthithur 77% të të gjitha aplikimeve. Vetëm Spanja ka pranuar mbi 12 800 kërkesa në muajin shkurt, duke e renditur në krye të listës.

Nga ana tjetër, Greqia rezulton të ketë numrin më të lartë të aplikimeve për çdo 100 mijë banorë (40.2), ndjekur nga Spanja (26.3) dhe Luksemburgu (25.6), një tregues i presionit relativ që këto vende përballojnë në raport me madhësinë e popullsisë së tyre.

Alarm për të miturit e pashoqëruar

Një tjetër aspekt shqetësues i këtij fenomeni janë aplikimet nga të miturit e pashoqëruar. Vetëm në shkurt, 1 720 fëmijë kanë aplikuar për herë të parë për azil në BE, shumica nga Siria, Afganistani dhe Egjipti – fëmijë që shpesh udhëtojnë vetëm, në kushte të rrezikshme dhe të pasigurta.

Gjermania ka regjistruar numrin më të lartë të aplikimeve nga të mitur të pashoqëruar (575), e ndjekur nga Spanja (330) dhe Greqia (245), duke ngjallur shqetësim për mbrojtjen e të drejtave të fëmijëve në procesin e azilit.

Perspektivë: Fundi i fenomenit të azilit nga Shqipëria?

Të dhënat e publikuara sinjalizojnë një frenim të dukshëm të azilit si kanal emigrimi për shqiptarët. Por ndërkohë që shifrat zyrtare zbresin, mbetet ende e paqartë nëse kjo pasqyron një përmirësim të kushteve ekonomike dhe sociale në vend, apo një adaptim i emigracionit drejt formave më të strukturuara, përmes punësimit sezonal, kontratave afatshkurtra dhe kanaleve të legalizuara të migrimit.

Për sa kohë që faktorët shtytës – papunësia, mungesa e perspektivës dhe mungesa e shpresës – vazhdojnë të ekzistojnë në vend, ikja nuk ka marrë fund. Thjesht po ndryshon formë. Dhe për vendimmarrësit, kjo është një dritë e kuqe që nuk duhet injoruar.