Rezultatet e (pa)ditura të zgjedhjeve që askush s’i mori seriozisht

Procesi i numërimit të votave ka përfunduar në 5 bashki të vendit, duke konfirmuar edhe një herë atë që dihej që para nisjes së fushatës, socialistët kanë marrë shumicën dërrmuese të votave, ndërsa pjesëmarrja ka qenë më e ulët se kurrë, vetëm përqindje që nuk kalon shifrën 20%.

Në Berat, ku në kuti u numëruan 116 fletë votimi (apo më saktë, sa për të mbajtur procesin gjallë), Ervin Ceca i Partisë Socialiste doli fitues me 13,050 vota, duke lënë pas me një diferencë prej mbi 10 mijë votash rivalin Pavllo Shkarpa, që siguroi vetëm 2,607 vota.

Pjesëmarrja? Vetëm 19.88% – mjaftueshëm për të quajtur “zë popullor” në një qytet të tërë.

Në Cërrik, historia përsëritet: Florenc Doka i PS-së fitoi me 66.22% të votave (6,201 gjithsej). Pas tij, Eligerti Hima nga “Shqipëria Bëhet” mori 13.62% (1,275 vota), ndërsa i pavaruri Amarildo Hoxha, i mbështetur nga PD, siguroi 20.16% (1,888 vota). Një garë që më shumë dukej si formalitet sesa betejë elektorale.

Në Vlorë, numërimi i 231 kutive mbylli edhe më qartë panoramën, Brunilda Mersini e PS-së mori plot 78.4% të votave, ose 15,672 në total. Rivalët e saj u mjaftuan me shifra simbolike – Dionis Sota (11.7%) dhe Gjergj Nika (9.9%).

As në Mat dhe Tepelenë nuk ndryshoi skenari, fitore të thella të socialistëve, pjesëmarrje e vakët dhe zero surpriza.

Në Mat, Altin Bojni mori 66.09% të votave (7,302 gjithsej), ndërsa Eduart Brahilika dhe Suzana Pasha, të dy të pavarur, siguruan përkatësisht 28.42% dhe 4.99%.

Në Tepelenë, Gramos Sako fitoi me 77.85% kundrejt 22.15% të Gabriel Gumës.

Në përfundim, zgjedhjet u mbyllën ashtu siç nisën, me fitues të paracaktuar dhe me një elektorat që duket se ka zgjedhur të qëndrojë në shtëpi. Në një vend ku rezultati dihet paraprakisht, surpriza e vetme mbetet sa pak njerëz ende shkojnë për ta “konfirmuar” atë me votë.