Rihapen kufijtë tokësorë, hiqet karantinimi i detyrueshëm. Rifillojnë aktivitetin kopshtet, çerdhet, palestrat dhe futbolli

Ministrja e Shëndetësisë Ogerta Manastirliu ditën e djeshme ka shpalosur edhe planin e masave lehtësuese duke filluar nga dita e sotme.

Për qytetarët dhe bizneset nuk do të ketë më kufizime, duke mos i ndarë më qytetet në zona të kuqe dhe të gjelbërta, që do të thotë se qytetarët mund të lëvizin lirshëm edhe nga një qytet në tjetrin.

Do të rihapen kufijtë tokësorë pa detyrim karantinimi, përveç rasteve kur kjo do të vendoset nga autoritetet shëndetësore, nëse personat që hyjnë në Shqipëri do të vijnë nga shtete që kanë konfirmuar numër të madh të infektuarish.

Plazhi fillon sot për hotelet, ndërsa duhet pritur data 6 qershor që plazhet të jenë të hapura për të gjithë qytetarët.

Gjithashtu duke filluar nga dita e sotme fëmijët do të kenë mundësi të rikthehen në kopshte dhe çerdhe, ndërsa do të rifillojnë aktivitetin e tyre edhe palestrat, qendrat e internetit , kurset profesionale ose edukative dhe konkurset e punësimit.

Pas një pushimi më shumë se zakonisht do të rikthehen edhe kampionatet e futbollit, por këtë herë pa spektatorë, për të mos rrezikuar një vaklë të dytë infeksionesh.

Ende nuk ka një datë për rifillimin e transportit publik, por kryeministri Rama ka deklaruar se po hartohet një plan për rifillimin e këtij aktiviteti.