Rrëfehet Safet Gjici: Nuk do e merrja kurrë Kukësin po ta mendoja sërish, vazhdoj ta mbaj me humbje sepse…

Presidenti i Kukësit, Safet Gjici, i ftuar në “Procesin Sportiv”, rrëfen aventurën në gjithë këto vite tek ekipi verilindor, si dhe shprehet se nëse do e mendonte edhe njëherë, nuk do i futej kësaj rruge, pas këtyre peripecive që ka kaluar 7 vite te Kukësi.

FUTBOLLI NË VIJË? – “Ky është problem i shqiptarëve, që nuk bëhemi të gjithë bashkë. Edhe ne, 10 presidentë klubesh, duhet të mblidhemi bashkë. Duhen falënderuar që këto 10 veta investojnë nga pasuria e familjeve të veta, për të rritur futbollin. Edhe ne, nuk po gjejmë gjuhën e përbashkët të bëhemi. U bë Liga, por nuk e dimë çfarë do na sjellë tashmë. Të paktën, ekipeve të Superligës, ato investime që bëjmë, të na kthehet diçka mbrapsht. Vjen një ditë, që nuk kemi mundësi më, dhe thua mjaft. Për kaq vite, asnjë ekip nuk është kthyer në biznes, përveç Korçës që u fut në grupe. Të tjerat kanë jetuar me shumë vështirësi. Dhe tani, shumë ekipe po e shohim që kanë probleme të thella financiare. Është shumë e vështirë ta menaxhosh, të kesh akademinë, infrastrukturën.”

PSE VAZHDONI ME HUMBJE? – “Këtë që kemi kaluar ne, shumë presidentë që kanë investuar, si edhe ish-presidenti i Partizanit, Bert Xhani, dhe kur erdhi fundi, ja ku jemi. Xhani ka investuar shumë nga pasuritë e tij për futboll. Në futboll, ti e di që po tu fut në gjak, të mban me vete. Mua më lidh se jam edhe i zonës në Kukës, por unë jam edhe tifoz. Thua ta lë këtë vit, por mendon ta mbaj edhe një vit, e ta lë vitin tjetër.”