Prapaskenat e bujshme

Ngjarja e rëndë e dy ditëve më parë në Tiranë, ku një 27-vjeçar u rrëmbye, u dhunua dhe u detyrua të dorëzonte 5000 euro, po zbulon gjithnjë e më shumë elementë që e lidhin këtë episod me emra dhe ngjarje të tjera problematike që prej vitesh kanë dalë në skenë, veçanërisht në zonën e Lezhës dhe Shëngjinit. Sipas policisë, pengmarrja u organizua nga dy vajza, Suate Çeloaliaj dhe Monika Marku, të cilat përmes një apartamenti të marrë me qira krijuan kurthin ku u thirr 27-vjeçari. Brenda pritnin tre djem, mes tyre Asmireld dhe Klajdi Nimani, të cilët bashkë me Lusjan Kimzën përdorën dhunë fizike dhe presion psikologjik për të marrë paratë. Shuma u gjet më pas në banesën e Kimzës, ku policia sekuestroi edhe një armë zjarri, ndërsa babai i tij u arrestua. Klajdi Nimani vijon të jetë në kërkim.

I afërmi i tij është Astrit Nimani, i dënuar gjatë në Itali për çështje të trafikut të drogës, i shpallur në kërkim ndërkombëtar dhe i arrestuar në Shqipëri, ai ka pasur ndër vite edhe episode të tjera të dokumentuara, mes të cilave një aksident i ndodhur në aksin Lezhë–Shëngjin, ku rezultoi nën efektin e alkoolit dhe iu gjet një armë zjarri që po tentohej të fshihej nga një i ri.

Astrit Nimani njohet si biznesmen në Shëngjin, ku zotëron resortin “Ermiri Palace”.