Rrezikon shembjen Ura e Çengelajt mbi Shkumbin, kërkohen masa urgjente

Ura e Çengelajt mbi lumin Shkumbin, që lidh zonën e Peqin me atë të Belsh, është kthyer në një shqetësim serioz për autoritetet vendore për shkak të gjendjes së saj të amortizuar.

E ndërtuar më shumë se gjashtë dekada më parë, kjo urë ishte projektuar fillimisht vetëm për t’i shërbyer digës në zonë dhe jo për qarkullim të dendur rrugor. Megjithatë, vitet e fundit ajo është përdorur gjerësisht nga drejtuesit e mjeteve, përfshirë edhe automjete me tonazh të rëndë, çka ka përshpejtuar ndjeshëm degradimin e strukturës së saj.

Për të shmangur rrezikun e ndonjë incidenti të mundshëm, Bashkia Peqin ka marrë vendimin për të ndaluar qarkullimin mbi urë të mjeteve që peshojnë më shumë se 3.5 ton. Masa synon të reduktojë presionin mbi strukturën ekzistuese dhe të garantojë sigurinë e përdoruesve të rrugës.

Megjithëse ura përdoret shpesh nga banorët e fshatrave përreth në zonat e Peqinit dhe Belshit, kufizimi i qarkullimit nuk pritet të sjellë izolim të komuniteteve. Sipas autoriteteve, ekzistojnë rrugë alternative për lëvizjen e banorëve, edhe pse ato kërkojnë një distancë disi më të gjatë për t’u përshkuar.

Ndërkohë, Ministria e Bujqësisë dhe Zhvillimit Rural ka kërkuar ndërhyrje urgjente për të parandaluar rreziqet e mundshme. Mes masave të propozuara është vendosja e kufizuesve fizikë në hyrje dhe dalje të urës, me mbështetjen e Policia e Shtetit në Peqin, si dhe monitorimi i vazhdueshëm i respektimit të këtij vendimi.