Saimir Tahiri: Më dërgoni në burgun e Lushnjes

Gjykata e Posaçme e Apelit për Korrupsionin dhe Krimin e Organizuar në muajin shkurt të këtij viti dha vendimin për ish-ministrin e Brendshëm, Saimir Tahirin.

Gjykata la në fuqi vendimin e shkallës parë, me ndryshimin që Tahiri do të vuajë në burg dënimin me 5 vite heqje lirie.

Për shkak të uljes së dënimi, Tahiri do të kalojë në burg 3 vite e 4 muaj. Ish-ministri në bazë të procedurës, vuajti dënimin në një burg të sigurisë së zakonshme, konkretisht te burgu “313” në Tiranë, teksa më pas u transferua në burgun e Fierit.

E si duket Tahirit nuk i ka pëlqyer burgu në Fier, pasi kërkon të ndryshojë burg dhe të afrohet sa më pranë familjes.

Kërkesa e dorëzuar pak ditë më parë pranë drejtorisë së përgjithshme të burgjeve sipas burimeve të mediave synon ndryshimin e qelisë nga ai i Fierit në një burg të sigurisë së zakonshme në burgun e Kosovës në Lushnjë.

Burime për mediat bëjnë me dije se kërkesa për ndryshimin e burgut sipas kërkesës së ish zyrtarit të lartë nuk është marre ende në shqyrtim mbasi komisioni është ndarë me dy qëndrime.