S’do e besoni dot se kë fajëson Vuçiç për humbjen me Shqipërinë

Shqipëria ka arritur një fitore historike ndaj Serbisë, duke siguruar tre pikë të çmuara në rrugëtimin drejt kualifikimit për Kupën e Botës 2026. Ndeshja u zhvillua të shtunën në qytetin e Leskovcit, ku kombëtarja shqiptare u tregua superiore, me një lojë të organizuar dhe dominim në fushë.

Pas përfundimit të takimit, tensionet u zhvendosën jashtë stadiumit, me presidentin serb Aleksandër Vuçiç që hodhi akuza në drejtim të një grupi protestuesish, të cilët, sipas tij, kishin ndikuar negativisht në përgatitjet e ekipit serb.

Vuçiç deklaroi se rreth dy apo treqind protestues ishin mbledhur pranë hotelit ku qëndronte skuadra në qytetin e Nishit, duke krijuar një atmosferë shqetësuese për lojtarët. Ai i cilësoi protestuesit si “mokasina” dhe i akuzoi për sabotim të qëllimshëm ndaj ekipit kombëtar.

“Ky grup nuk donte suksesin e Serbisë. Ata synuan të tensiononin situatën dhe të dëmtonin përgatitjet e ekipit”, u shpreh Vuçiç, duke u bërë thirrje qytetarëve të reflektojnë për ndikimin e veprimeve të tyre ndaj interesave kombëtare.

Ndërkohë, fitorja e Shqipërisë është pritur me entuziazëm nga tifozët dhe opinioni sportiv në vend. Kjo është një nga fitoret më të rëndësishme të kombëtares, e cila tashmë merr një hap të madh drejt ëndrrës për pjesëmarrje në Kampionatin Botëror 2026.