Sekuestrohet makina e Agasit, e fshehur në “Equos Resort”

Prokuroria e Posaçme (SPAK) ka sekuestruar një automjet luksoz në pronësi të Ergys Agasit, i arrestuar një ditë më parë në kuadër të hetimeve që lidhen me procedurat e prokurimeve të Agjencisë Kombëtare të Shoqërisë së Informacionit (AKSHI).

Bëhet fjalë për një automjet tip Land Rover Defender, i cili ishte në kërkim nga autoritetet. Sipas informacioneve të raportuara, makina ishte fshehur në garazhin e njërës prej vilave në “Equos Resort”, ku më pas është lokalizuar dhe sekuestruar.

Ergys Agasi u arrestua një ditë më parë në Durrës, në zonën e Plepave, gjatë një operacioni të zhvilluar nga strukturat e Policisë në bashkëpunim me Byronë Kombëtare të Hetimit (BKH) dhe SPAK-un.

Sipas raportimeve, Agasi u lokalizua teksa po udhëtonte me një automjet. Bashkë me të ndodhej edhe Uljan Shpataraku, i cili gjithashtu u arrestua gjatë operacionit.

Agasi ishte shpallur në kërkim që prej dhjetorit 2025, pasi ndaj tij ishte lëshuar urdhër-arrest në kuadër të hetimeve të SPAK për procedurat e prokurimeve të AKSHI-t. Sekuestrimi i Land Rover Defender vjen në vijim të veprimeve hetimore dhe operacionale të ndërmarra pas arrestimit të tij.