Serbia lëshon urdhër-arrest për gazetarin shqiptar

Shqipëria do të përballet me Serbinë më 11 tetor në një ndeshje kualifikuese për Kupën e Botës, e cila do të zhvillohet në qytetin e Leskovacit. Përballja mes dy skuadrave ishte parashikuar fillimisht të luhej në Beograd, por është zhvendosur për arsye sigurie.

Megjithatë, një mungesë e rëndësishme në stadium do të jetë ajo e gazetarit të njohur sportiv, Arlind Sadiku, i cili nuk do të jetë prezent për të raportuar nga vendngjarja. Vetë Sadiku ka bërë të ditur se nuk mund të udhëtojë në Serbi, pasi ndaj tij ekziston një urdhër-arrest nga autoritetet serbe.

“Jam interesuar përmes institucioneve serbe, përmes shqiptarëve që kemi në Luginën e Preshevës. Megjithatë, më është konfirmuar se ka një urdhër-arrest ndaj meje, kështu që nuk do të më lejohet të udhëtoj,” – deklaroi ai në një paraqitje televizive në Kosovë.

Zhvendosja e ndeshjes nga kryeqyteti serb në Leskovac, si dhe ndalimi i hyrjes për një gazetar shqiptar, janë tregues të tensioneve ende të pranishme mes dy vendeve, që reflektohen edhe në arenën sportive.