SHÇBA arreston shefin e Zyrës së Kërkimit “Fast Albania”

Akuzohet për “shpërdorim detyre”, “kallëzim të rremë” dhe “mashtrim”

SHÇBA ka arrestuar një tjetër efektiv të Njësisë “FAST Albania” në Drejtorinë e Përgjithshme të Policisë së Shtetit.

Efektivi 46-vjeçar, me detyrë shef i Zyrës së Kërkimit në “Fast Albania” është arrestuar për Shpërdorim Detyre”, “Kallëzim i rremë” dhe “Mashtrim”.

Kujtojmë që më herët ka rënë në pranga shtetasi Sokol Fana, i cili i kërkoi 7 mijë euro Klodian Hajdërllit, në mënyrë që të mos e arrestonte për llogari të drejtësisë italiane.

NJOFTIMI

Tiranë- Shërbimi për Çështjet e Brendshme dhe Ankesat (SHÇBA) ekzekutoi vendimin penal nr. 1016 të Gjykatës pranë Shkallës së Parë Elbasan, e cila ka vendosur masën e sigurimit personal “Arrest me burg” për Komisarin F.A., me detyrë Shef i Zyrës së Kërkimit “Fast Albania” pranë Drejtorisë Operacionale në DPPSH.

Vendimi i Gjykatës së Rrethit Elbasan për masën e sigurimit ndaj 46-vjeçarit u mor në kuadër të thellimit të hetimeve të kryera nga Drejtoria Rajonale e SHÇBA Elbasan nën drejtimin e Prokurorisë së Rrethit Elbasan, në funksion të procedimit penal Nr 1693/2021 për veprat penale “Shpërdorim Detyre”, “Kallëzim i rremë” dhe “Mashtrim”.

Në kuadër të këtij procedimi penal, Drejtoria Rajonale e SHÇBA Elbasan ka arrestuar më parë në kuadër të ekzekutimit të vendimeve të Gjykatës edhe punonjësin e policisë Inspektor S.F., pjesë e strukturës operacionale të “Fast Albania” dhe shtetasin K.H., person me precedent penalë dhe kriminalë në fushën e trafikimit të narkotikëve.

Veprimet dhe aktet proceduriale të përpiluara u vunë në dispozicion të Prokurorisë Elbasan. Hetimet vazhdojnë.