Shefi i policisë që u arrestua si i dehur pas aksidentit: Kërkoj drejtësi…

Disa ditë më parë, shefi i policisë së Patosit, Flamur Veliu, u vu në pranga pasi siç u tha në media, u përfshi në një aksident automobilistik dhe kishte qenë automjeti i tij ai që kishte përplasur disa automjete të tjera.

Mirëpo, veç kësaj, ditën e diel, kur u arrestua, Veliut i është bërë testi dhe ka rezultuar se ka qenë nën efektin e alkoolit.

Vetë shefi i policisë, një ditë pasi është lënë i lirë nga gjykata, ka sqaruar se komunikata e lëshuar për mediat nuk ka qenë aspak e vërtetë dhe jo vetëm që nuk ka qenë nën efektin e alkoolit, por makina e tij nuk është përplasur, por vetëm fërkuar me një automjet tjetër.

Në një komunikim me Report Tv, Flamur Veliu shprehet:

Kërkoj të vendoset drejtësia. Nuk jam përfshirë në aksident, makina që drejtoja thjesht është fërkuar me një automjet tjetër.
Nuk kam qenë i dehur. Testi i alkoolit është bërë disa orë pas ngjarjes.  Jam lënë i lirë pas fërkimit të mjeteve, më pas jam shoqëruar në komisariat ku më është bërë testi i alkoolit, në shkelje ligjore.
Dua të vendos dinjitetin në vend dhe ia lë në dorë drejtësisë. I sugjeroj ShÇBA-së të mos merret me gjëra të vogla, por të hetojë korrupsionin me njerëzit që vjedhin e kanë vënë pasuri.
Unë kam qenë shef komisariati dhe jetoj në një shtëpi 70 m2. Ata që kanë qenë në vendin tim sot janë bërë milionerë. Kanë vila dhe biznese”.