SHKODER/“Iku gjysma e sezonit turistik”, pronarët e motorëve të ujit: S’na lejojnë daljen në det

Sipas protestuesve, Policia Kufitare nuk i lejon për shkak se nuk është bërë kufizimi ujor për lëvizjen e këtyre mjeteve. Këtë kufizim, thonë protestuesit, duhet ta bëjë Bashkia Shkodër, gjë e cila nuk ka ndodhur dhe që po i penalizon ata. Albert Frroku është një prej pronarëve që shpreh këtë shqetësim. “Janë paguar të gjitha detyrimet financiare që kemi pasur sipas ligjit në fuqi që në gjysmë të muajit shkurt të këtij viti dhe kemi aplikuar për të marrë lejet përkatëse nga Policia Kufitare e Shkodrës. Unë kam 8 mjete motorë uji dhe në total janë 8 milionë lekë të vjetër detyrime që kam paguar. Pastaj, duhen shtuar këtu edhe siguracionet dhe pjesa që paguajmë në tatim-taksa për punonjësit.

Ka 32 ditë që i lutemi që të na lejojnë që të punojmë dhe nuk na e japin këtë leje. Policia ia lë fajin bashkisë sepse këta të fundit nuk kanë bërë kufizimin në det se ku duhet të lëvizin motorët e ujit. Kufizimin ujor nuk mund ta bëjmë ne. I bëjmë lutje Bashkisë Shkodër dhe Policisë Kufitare që të na lejojnë të punojmë. Kemi komplet dokumentacionin e rregullt dhe kemi disa vite që punojmë me këtë punë, duke mbajtur familjet tona. Punë tjetër s’kemi”, thotë Frroku. Një tjetër protestues, Nedrit Krruqi, shprehet se që më 1 qershor pretendohet se është hapur zyrtarisht sezoni turistik në Velipojë, ndërsa ata nuk po lejohen që të punojmë.

Protestuesi Krruqi ka niptin e hapur dhe krejt detyrimet e paguara, ndërsa një muaj i ka shkuar dëm. Ai thotë se mbetet shumë pak kohë për të punuar, duke i sjellë një dëm të madh ekonomik. “Kërkojmë një zgjidhje, sepse nuk mund të vazhdojmë në këtë mënyrë. Ne jemi të rregullt dhe s’kemi pse të penalizohemi”, deklaron Krruqi. Protestuesi tjetër, Besim Shima, shprehet se nuk di se nga të shkojë sepse i ka provuar të gjitha mënyrat.