Rrezikohen 13 të rinjtë

Një ngjarje shqetësuese është regjistruar këtë të martë në zonën e Belsh, ku një drejtues mjeti që transportonte nxënës është ndaluar nga policia pasi rezultoi në gjendje të dehur.

Sipas të dhënave zyrtare, ndërhyrja e policisë erdhi pas një telefonate të një qytetari në sallën operative të Cërrik. Menjëherë pas sinjalizimit, shërbimet e Policisë së Belshit, në bashkëpunim me patrullën e komisariatit të Cërrikut, organizuan një kontroll në terren.

Gjatë operacionit u ndalua një mjet tip “Benz Sprinter”, që qarkullonte në aksin Belsh–Gjolene. Në timon ishte shtetasi Sazan Jashar Gjolena, 53 vjeç, i cili po transportonte 13 nxënës të gjimnazit Sami Frashëri.

Pas testimit me alkoolmatës, drejtuesi rezultoi pozitiv në të dyja provat, me nivele 0.68 mg/l dhe 0.67 mg/l, duke konfirmuar se ai ishte në gjendje të dehur gjatë drejtimit të mjetit.

Menjëherë pas konstatimit, ai u shoqërua në Drejtorinë Vendore të Policisë Elbasan për veprime të mëtejshme procedurale, ndërsa uniformat blu morën masa të menjëhershme për të garantuar sigurinë e nxënësve, duke organizuar transport alternativ për ta.

Autoritetet u bëjnë thirrje të gjithë drejtuesve të mjeteve të tregojnë përgjegjësi maksimale, veçanërisht kur transportojnë fëmijë, duke theksuar se raste të tilla përbëjnë rrezik serioz për jetën dhe sigurinë rrugore.