Shpalle urdhrin e arrestit për veten, Rama!

Është arrestuar Xhulia Aliaj, Rama, për shkak të një statusi në profilin e saj.

Ndërkohë bredhin dhe janë krejt të lirë, të gjithë ndërtuesit e pallateve që u shembën, të cilët janë në vetë të parë përgjegjësit e kësaj tragjedie. Mundohesh ta quash pabesi të natyrës, por para se të jetë pabesi e natyrës është pabesi njerëzore dhe profesionale e firmave të ndërtimit të atyre pallateve.

Shpalle urdhrin e arrestit për veten, Rama se u kuptua qartë që Shqipëria, nuk pati asnjë qindarkë të lënë mënjanë për ditët e vështira.

Shpalle urdhrin e arrestit për veten, Rama, se në këto çaste tragjike, shqiptarët nuk i besojnë asnjë qindarkë qeverisë për të mbështetur të prekurit nga tërmeti, pasi plaçkitja është kryefjala e sistemit që ti vetë ke ngritur që prej gjashtë vitesh.

Shpalle urdhrin e arrestit për veten, Rama dhe lëre të lirë atë vajzë, e cila nuk ka bërë gjë tjetër veçse ka shprehur ankthin e saj; ankth i cili ka mbërthyer shpirtrat e shqiptarëve që prej datës 26 nëntor.

Post Scriptum- Fotot artistike me të prekurit nga tërmeti, nuk bindin më askënd. Ndaj ki mirësinë të na i kursesh shfaqjet e dashurisë, se e kemi krejt të qartë dashurinë tënde për popullin shqiptar që prej gjashtë vitesh.