Shpërthim i fuqishëm me tritol në Sarandë, shembet hoteli; dëmtohen godinat përreth

Një shpërthim i frikshëm tritoli ka tronditur qytetin e Sarandës, ku është hedhur në erë një nga hotelet më të vjetra të qytetit.

Bëhet fjalë për hotelin në pronësi të shtetasit Spiro Çabiri.

Si pasojë e shpërthimit të fuqishëm, hoteli është rrafshuar, pasi sasia e lëndës eksplozive të vendosur ka qenë tepër e madhe.

Nga shpërthimi është shkaktuar panik mes banorëve në zonë, të cilët janë zgjuar të frikësuar, ndërsa janë dëmtuar edhe disa biznese përreth.

Ngjarja ndodhi në orën 05:54 në bulevardin e qytetit, ndërsa deri më tani nuk raportohet për persona të lënduar.

“Ky është terror. Ishte e tmerrshme. Ky është një akt terrorist”, mësohet të kenë thënë banorët pasi u zgjuan nga shpërthimi i fuqishëm me eksploziv i hotelit në Sarandë.

Hoteli 2-katësh ishte ndërtuar rreth viteve ’90 .

Policia dhe grupi hetimor kanë shkuar në vendin e ngjarjes dhe kanë nisur hetimet përkatëse.