IDC-CDI miraton rezolutën që dënon procesin e 11 majit dhe kërkon qeveri teknike

Organizata më e madhe politike në botë, Internacionalja Demokrate e Qendrës – IDC/CDI, me 108 parti anëtare nga mbarë globi, ka miratuar një rezolutë të fortë dënuese ndaj zgjedhjeve parlamentare të 11 majit në Shqipëri, duke i cilësuar ato si një “farsë politike” që nuk përmbushi asnjë nga standardet ndërkombëtare për zgjedhje të lira dhe të ndershme.

Rezoluta u miratua më 30 maj në Asamblenë e Përgjithshme të IDC/CDI, mbajtur në Abixhan të Bregut të Fildishtë, pas paraqitjes së provave dhe materialeve nga përfaqësuesit e Partisë Demokratike të Shqipërisë, Albana Vokshi dhe Belind Këlliçi.

Në dokumentin zyrtar, IDC/CDI thekson se procesi zgjedhor në Shqipëri u shoqërua me presion sistematik ndaj votuesve, frikësim, blerje vote, keqpërdorim masiv të burimeve publike, kontroll të qeverisë mbi median dhe censurë politike, përfshirë ndalimin e TikTok për arsye të hapur politike. Veçanërisht problematike u konsiderua shpërndarja e bonuseve prej 100 euro për 760.000 pensionistë, fshirja e borxheve dhe gjobave me vlerë mbi 200 milionë euro vetëm pak ditë para votimeve, dhe shpenzimi i rreth gjysmë miliard euro në tenderë dhe koncesione në kundërshtim me ligjin.

Rezoluta thekson se këto veprime përbëjnë shkelje të rëndë të kritereve të Kopenhagenit, që lidhen me lirinë e votës, ndarjen e partisë nga shteti dhe lirinë e shprehjes.

Organizata kërkon formimin e menjëhershëm të një qeverie teknike, për organizimin e zgjedhjeve të reja, zbatimin e rekomandimeve të OSBE/ODIHR, si dhe ndërprerjen e përndjekjes politike ndaj liderëve opozitarë, përfshirë Sali Berishën, Ilir Metën, Fatmir Mediun, Ervin Salianjin dhe Fredi Belerin.

IDC-CDI ngre alarmin për:

Kapjen e shtetit dhe bashkëpunimin me elementë kriminalë për të manipuluar zgjedhjet;
Pandëshkueshmërinë institucionale, ku mbi 200 kallëzime për krime zgjedhore dhe qindra denoncime pranë KQZ kanë mbetur pa ndjekje penale;
Presionin sistematik ndaj administratës publike, që sipas rezolutës u shndërrua në “rrjet patronazhistësh” për fushatën e PS-së.

Në një deklaratë të bërë në rrjetet sociale, Belind Këlliçi e cilësoi miratimin e rezolutës si një “fitore të së vërtetës ndaj propagandës”, ndërsa Sali Berisha e përshëndeti si një konfirmim të faktit se zgjedhjet nuk ishin të lira e as të ndershme.

Çfarë kërkon IDC/CDI?

Zbatim të rekomandimeve të OSBE/ODIHR për reforma zgjedhore;
Ndërprerje të përndjekjes politike ndaj liderëve opozitarë;
Qeveri teknike për zgjedhje të reja;
Pluralizëm mediatik dhe akses të barabartë për opozitën;
Mision ndërkombëtar vëzhgimi në Shqipëri për verifikim të fakteve në terren;
Kushtëzim të negociatave të BE me Shqipërinë përmes reformave zgjedhore e demokratike.

Organizata paralajmëron se “konsolidimi autoritar dhe ndikimi kriminal në Shqipëri përbëjnë kërcënim serioz për demokracinë dhe stabilitetin në Ballkanin Perëndimor”.