Shtëpitë ngjitur kompensohen, të tyret jo, nga Bregu i Lumit – Ramës: Mos na provoko!

Banorët e Bregut të Lumit i kanë bërë thirrje sot kryebashkiakut Erion Veliaj dhe Kryeministrit Edi Rama të mos i provokojnë me kërcënimet për shembjen e shtëpive, ca më tepër në kushtet kur duket qartë se po bëhet diskriminim.

Ata janë ngritur sot në protestë, pasi sot përfundon afati për qëndrimin e tyre aty dhe duhet të largohen pasi do të vijojnë punimet për bulevardin e ri të Tiranës.

“I lutem Kryetarit të Bashkisë dhe Kryeministrit, të mos na provokojnë, – tha njeri nga protestuesit. –  Sot është afati i fundit, ne shtëpinë tona nuk e lirojmë.

Na ka vënë dhe 5 milionë lekë të vjetra gjobë për të liruar shtëpinë.

Po nuk është e drejtë të dal në rrugë kur kam që në vitin 2005 që kam kërkuar leje legalizimi dhe me ka hequr nga legalizimi kur unë jam banor i Tiranës.

Kam që në vitin 2000 që jam këtu, kam 18 vjet dhe i kam paguar të gjitha.

Do ta mbroj shtëpinë timë qoftë edhe me gjak.

A e shihni bulevardin? Më thotë se deri këtu janë shpronësuar. Ky është diskriminim, dallim i madh për ne. Kur deri këtu paguhet dhe këtej s’ka më shpronësim?! Atëhërë ta lëjë kur nuk ka lekë për shpronësim. Kemi tre muaj që protestojmë.”