“Na e kërkoi Pëllumbi”

Ligji parashikonte qartë që kompania fituese e tenderit për ndërtimin e Tunelit të Llogarasë duhej të kishte të paktën 5 vite eksperiencë dhe të kishte realizuar mbi 70% të një tuneli si pjesë e punëve të ngjashme. “Gjoka Construction” nuk përmbushte këto kritere.

Sipas dokumenteve të SPAK-ut, kriteret e tenderit u ndryshuan në mënyrë të dyfishtë: fillimisht kërkohej që kompanitë të kishin një fitim para taksave, interesave dhe amortizimit prej 50 milionë euro gjatë periudhës 2015–2019, ndërsa me rishikimin kjo vlerë u ul në 20 milionë euro. Po ashtu, kërkesa për punët e ngjashme u ul nga 70% në 50% të fondit limit të kontratës, dhe periudha e kërkuar për ndërtimin e tunelit u reduktua nga 5 në 3 vite. Ndërsa dy ndryshimet e para dukeshin të zgjeronin numrin e kompanive pjesëmarrëse, ndryshimi i tretë kishte efekt të kundërt: orientonte tenderin drejt një kompanie të vetme.

SPAK ka dokumentuar edhe komunikimet mes Belinda Ballukut dhe vartësit të saj, Evis Berberi, që e konfirmojnë këtë manipulim:

“Ne daten 26.01.2021, ne oren 12:25, Belinda Balluku i shkruan Evis Berberi: ‘Nje pyetje’.
Evis Berberi: ‘Po’.
Belinda Balluku: ‘Kemi ndryshuar tek tuneli eksperiencën e objekteve të ngjashme nga 5 vite në 3???’
Evis Berberi: ‘Kerkoi Pellumbi, të jetë 3 nga 5 vitet e fundit’.
Belinda Balluku: ‘Po c’ne? Kush e beri kerkesen e KPP?’
Evis Berberi: ‘Ne KPP, cfare kerkese eshte, nga takimi qe patem me Arten dhe Pellumbin më 31 dhjetor ai kerkoi që të jetë 3 nga 5 vitet e fundit. Sipas VKM, eksperienca duhet kërkuar 5 vitet e fundit. Nderkohe qe ai se kishte dhe e lamë 3 nga 5 vitet e fundit. Po Arta me tha që e kishte diskutuar përpara takimit me Pellumbin këtë gjë me ty’.”

SPAK evidenton gjithashtu edhe takime të tjera për diskutimin e kritereve, ku përfshihen Evis Berberi dhe Arta Gurabardhi. Në aplikacionin “Signal Private Messenger”, ata planifikojnë takime më 31.12.2020 dhe 05.01.2021 me Pellumbin për të diskutuar kriteret e punëve të ngjashme:

“Ne daten 30.12.2020, Arta Gurabardhi i shkruan Berberit: ‘Visi site kam mund të të tel?’.
Berberi: ‘Poo’.
Arta Gurabardhi: ‘Visi, e ke ok ta leme ne 11?’
Berberi: ‘Ok’.”

“Ne daten 05.01.2021, Arta Gurabardhi i shkruan Berberit: ‘Visi gjes. Te uroj vit të mbarë. Ike nr atij Pellumbit se nuk ia kam ruajtur ta therrasim dhe njëherë për atë çështjen e eksperiencës së mëparshme? Do kesh mundësi ti sot rreth ores 11?’
Berberi: ‘Po beso do kaloj per nr ta slë’.
Arta Gurabardhi: ‘Ok’.”

Për shkak të ndryshimeve në kriteret e tenderit, duhej shtyrë edhe afati i hapjes së ofertave. Fillimisht, tenderi duhej të hapej më 12 shkurt 2021, por pak ditë para kësaj date, Ministria e Infrastrukturës dhe Energjisë e shtyu afatin për në 12 mars 2021.