Si u zbulua edukatorja e çerdhes në Laprakë,se ishte infektuar me COVID

Mes rasteve të konfirmuara paraditen e sotme nga Ministria e Shëndetësisë për 50 të infektuar, mes tyre është dhe një edukatore e çerdhes nr.11 në Tiranë.

Mësohet se në datën 12 qershor, gjatë momentit të paraqitjes së saj në punë, sipas protokollit të zbatimit për masat e parandalimit të përhapjes së COVID-19, u konstatua se punonjësja e çerdhes nuk kishte shfaqur asnjë simptomë tjetër kur u konstatua me temperaturë.

Më pas kjo punonjëse është futur në banesën e saj në karantinë, ndërsa thuhet se nuk ka pasur kontakt me fëmijët e punonjësit e tjerë të çerdhes. Pasi i është nënshtruar analizave të tamponit, edukatorja ka rezultuar pozitive.

Drejtoria e Çerdheve dhe Kopshteve është në pritje të vënies në dijeni në mënyrë institucionale nga Operatori i Kujdesit Shëndetësor Vendor, i cili bën dhe konstatimin.

Gjithashtu do të jetë edhe Inspektorati Shtetëror Shëndetësor që do të marrë një vendim për ecurinë e procesit, i cili vë në dijeni Drejtorinë e Çerdheve dhe Kopshteve për masat që duhen marrë.