Arrestohet një polic, një tjetër në kërkim

Një ngjarje e rëndë me përmasa skandali ka tronditur Policinë e Qarkut Gjirokastër. Protagonistë të një videoje të shpërndarë së fundmi, ku shfaqen duke kryer veprime të turpshme me një 16-vjeçare, rezultojnë dy punonjës policie: Pajtim Baka dhe Artur Ago.

Pas publikimit të pamjeve, shefi i Krimeve në Komisariatin e Përmetit, Dhurim Çenko, është pezulluar nga detyra. Vendimi është marrë nga Drejtoria Vendore e Policisë Gjirokastër, e cila ka hapur edhe një hetim disiplinor ndaj tij për shkelje të rëndë, në bazë të Ligjit Nr. 82/2024 “Për Policinë e Shtetit”.

Në njoftimin zyrtar theksohet se shkeljet janë cilësuar me pasoja të rënda dhe pezullimi i Çenkos do të mbetet në fuqi deri në përfundimin e hetimit disiplinor. Për rastin është vënë në dijeni edhe Drejtoria e AMP Vlorë–Gjirokastër, që ka marrë në dorë procedurat për ndjekjen e policëve të përfshirë.

Nga ana tjetër, Gjykata e Gjirokastrës ka caktuar masën e sigurisë “arrest me burg pa afat” për policin Pajtim Baka, ndërsa kolegu i tij, Artur Ago, efektiv në Komisariatin e Tepelenës, është shpallur në kërkim dhe po ndiqet nga autoritetet.

Ky skandal ka hapur debate të forta mbi gjendjen e disiplinës dhe moralit brenda radhëve të Policisë së Shtetit, duke vënë në pikëpyetje mekanizmat e kontrollit dhe mbikëqyrjes së efektivëve.