SKANDALI! Bajamet me cianid bëjnë “kërdinë në tregun shqiptar

Një rast i rëndë që prek sigurinë ushqimore ka dalë në dritë në Shqipëri, duke ngritur alarmin për kontrollin e produkteve që konsumohen çdo ditë. Mbi 1.1 ton bajame pluhur të kontaminuara me acid hidrocianik, një substancë shumë toksike, rezultojnë të jenë hedhur në treg dhe të kenë arritur te konsumatorët në disa qytete të vendit.

Të dhënat zyrtare tregojnë se nga rreth 1,200 kilogramë produkt i importuar, vetëm një pjesë e vogël – rreth 42 kilogramë – është bllokuar dhe asgjësuar nga autoritetet, ndërsa sasia dërrmuese është shpërndarë dhe konsumuar pa u identifikuar në kohë.

Produkti është futur në Shqipëri nga Spanja dhe është importuar nga tre subjekte tregtare: Neranxi SHPK, Albania Smart Distribution dhe Alta Group. Bajamet e bluara janë shpërndarë në disa prej qyteteve kryesore, përfshirë Tiranën, Durrësin, Shkodrën, Fierin dhe Vlorën, përpara ndërhyrjes së institucioneve.

Acidi hidrocianik, i njohur si cianid hidrogjeni, përbën rrezik serioz për shëndetin. Ekspozimi ndaj tij mund të shkaktojë simptoma si dhimbje koke, marramendje, të përziera, të vjella dhe probleme me frymëmarrjen, ndërsa në raste të rënda mund të ketë pasoja edhe më të rënda.

Rasti ka hapur debat mbi mekanizmat e kontrollit dhe përgjegjësitë në zinxhirin e sigurisë ushqimore. Sipas kuadrit ligjor, jo vetëm institucionet shtetërore, por edhe vetë kompanitë importuese mbajnë përgjegjësi për verifikimin e produkteve përpara se ato të hidhen në treg.

Ndërkohë, përpjekjet për të marrë sqarime nga kompanitë e përfshira kanë qenë të pjesshme. Një prej tyre ka deklaruar se produkti ishte i pajisur me dokumentacionin përkatës, por pa specifikuar nëse janë kryer analiza laboratorike për praninë e substancës toksike.

Ky zhvillim ngre shqetësime serioze për standardet e kontrollit dhe transparencës në tregun ushqimor, veçanërisht për produkte që përdoren gjerësisht në industri dhe konsumohen çdo ditë nga qytetarët.