8 persona pritet të merren në pyetje

Hetimi për videot intime të kompozitorit Adrian Hila po zgjerohet, ndërsa Policia e Tiranës po përpiqet të zbardhë jo vetëm mënyrën se si janë regjistruar materialet, por edhe se si ato kanë dalë nga sistemi ku dyshohet se janë ruajtur dhe kanë përfunduar më pas në internet.

Drejtoria Vendore e Policisë Tiranë konfirmoi më 30 shtator nisjen e hetimeve kryesisht, pas publikimit dhe shpërndarjes online të materialeve filmike me përmbajtje intime.

Sektori për Hetimin e Krimeve Kibernetike po verifikon adresat IP, faqet dhe profilet që kanë publikuar apo shpërndarë materialet. Çështja është referuar në Prokurori për katër vepra penale: “Përgjimi i paligjshëm i të dhënave kompjuterike”, “Ndërhyrja në të dhënat kompjuterike”, “Ndërhyrja e padrejtë në jetën private” dhe “Keqpërdorimi i pajisjeve”.

Gazetari Ervin Leka, në emisionin “Off the Record”, ka dhënë detaje të tjera mbi veprimet që, sipas informacioneve të tij nga Policia e Tiranës, po kryhen në kuadër të hetimit.

Sipas Lekës, policia ka kontaktuar Adrian Hilën pasi ka rënë në gjurmët e materialeve dhe i ka kërkuar të paraqitet për të dhënë shpjegime. Gazetari tha se Hila kishte shprehur gatishmërinë për t’u paraqitur gjatë së enjtes, por deri në momentin e lidhjes televizive nuk ishte paraqitur në polici.

Raportime të tjera kanë bërë të ditur se kompozitori ishte kontaktuar edhe në telefon dhe se ai kishte pretenduar se kamera e tij ishte hakeruar. Sipas këtyre raportimeve, një patrullë policie kishte shkuar edhe në banesën e tij, por nuk e kishte gjetur aty.

Dy pista në fokusin e hetuesve

Pjesa kryesore e hetimit lidhet tashmë me origjinën e materialeve dhe mënyrën se si ato kanë dalë nga sistemi dhe janë shpërndarë në internet.

Sipas Ervin Lekës, policia po punon paralelisht në dy pista.

E para lidhet me mundësinë e një ndërhyrjeje të jashtme në sistemin e kamerave dhe marrjen e materialeve përmes një sulmi kibernetik. Dyshimi që po verifikohet është se një person mund të ketë cenuar sigurinë e sistemit, të ketë marrë materialet dhe më pas t’i ketë shpërndarë.

Pista e dytë lidhet me një skenar tjetër, i cili ende nuk është konfirmuar nga policia: mundësinë që materialet të jenë shitur në faqe pornografike dhe të jenë përdorur për të siguruar të ardhura.

Gazetari tha se verifikimi i kësaj piste mund të përfshijë edhe këqyrjen e transaksioneve ose të kartave bankare. Megjithatë, deri tani nuk ka një konfirmim zyrtar se videot janë shitur apo se ndonjë person ka përfituar financiarisht nga shpërndarja e tyre.

Kur kanë nisur të qarkullojnë videot?

Një tjetër element i rëndësishëm i hetimit është koha kur materialet kanë nisur të qarkullojnë në internet.

Sipas Lekës, gjurmët e shpërndarjes së videove shkojnë të paktën deri në prill të vitit 2026, kur materialet dyshohet se kanë qarkulluar në një grup në Telegram me mijëra anëtarë.

Në të njëjtën kohë, sipas informacioneve të bëra publike nga gazetari, regjistrimet u përkasin fundit të vitit 2024 dhe fillimit të vitit 2025.

Diferenca mes kohës së regjistrimit dhe asaj të shpërndarjes është një nga çështjet që hetuesit duhet të sqarojnë.

Sipas Lekës, sistemi ku dyshohet se janë regjistruar videot nuk i ruan materialet për një periudhë të gjatë. Për këtë arsye, një nga pyetjet e hetimit është nëse materialet janë marrë nga persona të tretë përmes ndërhyrjes në sistem apo nëse janë ruajtur më herët në pajisje të tjera, si kompjuterë apo USB.

Edhe ky element mbetet në fazën e verifikimit dhe nuk përbën një përfundim të hetimit.

Tetë persona pritet të pyeten

Hetimi nuk është përqendruar vetëm te Adrian Hila.

Sipas Ervin Lekës, rreth tetë persona pritet të merren në pyetje në lidhje me çështjen, mes tyre edhe dy burra që shfaqen në materialet intime.

Policia ka kontaktuar deri tani dy prej personave që shfaqen në video, ndërsa marrja e deklarimeve të tyre është shtyrë për një moment të dytë.

Deklarimet e personave të filmuar mund të ndihmojnë hetuesit për të përcaktuar rrethanat në të cilat janë regjistruar materialet, nëse personat kishin dijeni për ekzistencën e kamerës dhe nëse do të paraqesin kallëzim lidhur me publikimin apo shpërndarjen e tyre.

Në këtë fazë, policia nuk ka përcaktuar publikisht përgjegjësinë e ndonjë personi për nxjerrjen e videove.

Institucioni ka konfirmuar hetimin kibernetik, verifikimin dhe identifikimin e adresave IP, faqeve dhe profileve që kanë shpërndarë materialet, si dhe referimin në Prokurori të katër veprave penale.

Tashmë, hetimi teknik pritet të përcaktojë hallkën kryesore të çështjes: kush i ka marrë materialet nga sistemi ku ndodheshin, kush i ka publikuar fillimisht dhe nëse pas shpërndarjes së tyre ka pasur apo jo përfitim financiar.