“Skanohen” delegatët e Berishës/ Skena gati te “Air Albania”,

Tiranë- Në stadiumin “Air Albania” ka nisur futja e delegatëve të Kuvendit Kombëtar të thirrur nga Sali Berisha. Prej orës 09:00 të mëngjesit po vijon skanimi i mandatit të cdo delegati që ka firmosur dhe që po paraqitet për të hyrë në stadium.

Më pas do të ketë një komision që do të verifikojë cdo mandat.

Delegatët do të vendosen në një pjesë të veçantë të stadiumit, ndryshe nga pjesa tjetër e militantëve. Berisha ka njoftuar më parë se sot do të shkarkohet Lulzim Basha.

PD nuk e njeh këtë Kuvend duke e cilësuar miting dhe sot do të festojë 31 vjetorin e themelimit të partisë.

Axhenda

Që në orët e para të ditës së djeshme, punonjës të shumtë teknikë zbarkuan në stadiumin “Air Albania” për të bërë përgatitjet e fundit për Kuvendin e sotëm.

Në mesin e fushës inxhinierët elektrikë dhe skenografët kanë ngritur podiumin me ekrane dhe drita ku do të ngjiten personat që do të mbajnë fjalimin.

Në tribunën në krahun perëndimor të stadiumit janë vendosur banera të mëdhenj me sloganin “Më të bashkuar, më të fortë”. Ndërkohë, në krahun lindor të stadiumit dhe në pjesët anësore do të vendosen pjesëmarrësit në mbledhje.

Në katin e parë të stadiumit “Air Albania”, në anën lindore me kapacitet 5-6 mijë veta, do të vendosen delegatët. Ndërsa në katin e dytë të stadiumit dhe në pjesët anësore do të vendosen anëtarët e PD-së apo simpatizantët.

Në çdo portë hyrëse të stadiumit, delegatët do duhet të kenë me vete kartën e identitetit dhe kartën e demokratit. Personat përgjegjës do t’i pajisin delegatët me një draft me ndryshimet statutore.

Ndërkohë, përmes një pajisjeje elektronike dixhitale do të bëhet skanimi i barkodit të delegatit, ndërsa emri dhe funksioni i delegatit do të shfaqet në një ekran të madh, ku do të jetë i mundur identifikimi nga mediat.

Pasi të plotësohet numri mbi 1800 delegatë, mbledhja e Kuvendit do të konsiderohet e hapur dhe vetëm pasi të plotësohet numri mbi 4 mijë delegatë do të nisë diskutimi për ndryshimet statutore.

Siç e thamë pak më sipër, në momentin që delegatët futen në një nga portat hyrëse të stadiumit do të pajisen me një draft të ndryshimeve në Statut. Ata fillimisht do të kenë mundësi të njihen me ndryshimet që do të propozohen.

Pasi të plotësohet edhe kuorumi me delegatët, në podium do të ngjitet i pari për të mbajtur fjalën e tij kryetari i Këshillit Kombëtar, Edi Paloka.

Ndërkohë, më pas do të lexohen me radhë ndryshimet që propozohen në Statut. Pjesë e ndryshimeve pritet që të jetë edhe ajo që është pagëzuar nga Sali Berisha gjatë takimeve në foltore si neni “Basha”.

Në të do të sanksionohet që kryetari i partisë, nëse humb zgjedhjet e përgjithshme, atëherë është automatikisht i shkarkuar. Ndërsa rezervohen edhe ndryshime të tjera.

Pas kësaj faze, në podium do të ngjitet lideri historik i PD-së, Sali Berisha, për të mbajtur fjalimin e tij, ku pritet që t’u drejtohet delegatëve edhe me kërkesën për mocion mosbesimi ndaj kryetarit të Partisë Demokratike, Lulzim Basha. Ndërkohë, deri më tani në planin e organizatorëve nuk parashikohet që pas mbledhjes së Kuvendit të shkohet në selinë blu.

Ndonëse mbetet ende për t’u diskutuar nga organizatorët, në planet e “Foltores” pas Kuvendit parashikohet që të zhvillohet edhe një protestë dhe ndërkohë gradualisht do të zhvillohen edhe takime për hapjen e partisë.