Skënder Hita: Luftë pa kompromis ndaj armëve të ilegale dhe krimit

Policia e Shtetit forcon kapacitetet në luftën kundër armëve të paligjshme, teksa këtë të shtunë u zhvillua ceremonia e dorëzimit të Qendrës për Çaktivizimin e Armëve të Vogla dhe të Lehta. Ky investim i rëndësishëm është realizuar nga Prezenca e OSBE-së në Shqipëri, në bashkëpunim me Ministrinë e Brendshme dhe me mbështetje financiare nga Bashkimi Europian, Gjermania dhe Franca.

Në këtë aktivitet morën pjesë drejtues të lartë të institucioneve vendase dhe partnerëve ndërkombëtarë, përfshirë Drejtorin e Përgjithshëm të Policisë së Shtetit, Skënder Hita, Ministrin e Brendshëm, Besfort Lamallari, ambasadorin e OSBE-së në Tiranë, si dhe përfaqësues të Delegacionit të BE-së dhe ambasadave partnere.

Në fjalën e tij, Hita e cilësoi ngritjen e kësaj qendre si një hap të rëndësishëm drejt rritjes së sigurisë publike dhe përafrimit të Shqipërisë me standardet europiane në kontrollin e armëve. Ai theksoi se investimi është rezultat i një bashkëpunimi disa-vjeçar me partnerët ndërkombëtarë dhe përfaqëson një arritje konkrete në luftën kundër krimit të organizuar.

Sipas tij, qendra e re përmbush standardet më të avancuara ndërkombëtare dhe do të shërbejë për çaktivizimin e sigurt të armëve të zjarrit, duke reduktuar rrezikun e rikthimit të tyre në përdorim të paligjshëm.

Hita bëri të ditur se Policia e Shtetit vijon operacionet intensive kundër armëmbajtjes pa leje, ndërsa çdo vit sekuestrohen mesatarisht nga 650 deri në 700 armë të vogla e të lehta, së bashku me sasi të konsiderueshme municionesh.

Ai nënvizoi gjithashtu rëndësinë e forcimit të kapaciteteve operacionale, përfshirë njësitë K9, ku janë përmirësuar ndjeshëm kushtet e strehimit dhe trajtimit të qenve të policisë, si dhe janë rritur aftësitë e tyre në operacionet në terren.

Projekti ka kontribuar edhe në përmirësimin e kuadrit ligjor dhe rregullator, përmes përafrimit të standardeve kombëtare me praktikat më të mira ndërkombëtare, zhvillimit të trajnimeve të specializuara dhe sigurimit të infrastrukturës moderne për procesin e çaktivizimit të armëve.

Paralelisht, Policia e Shtetit vijon fushatat ndërgjegjësuese në komunitet, veçanërisht në shkolla dhe mes të rinjve, për të parandaluar rreziqet që lidhen me armëmbajtjen e paligjshme.

Në përfundim, Hita garantoi se institucioni që ai drejton mbetet i përkushtuar në forcimin e sigurisë dhe në bashkëpunimin me partnerët ndërkombëtarë për të luftuar krimin e organizuar dhe kërcënimet ndaj rendit publik.

Fjale e plotë e Skënder Hitës: 

Sot është një moment i rëndësishëm për Policinë e Shtetit dhe për të gjitha institucionet që kontribuojnë në sigurinë, stabilitetin dhe luftën kundër përhapjes dhe keqpërdorimit të armëve të vogla e të lehta. Por, mbi të gjitha, ky moment lidhet drejtpërdrejt me sigurinë e fëmijëve tanë, që janë e ardhmja e këtij vendi, çka përbën prioritetin më të lartë në punën tonë të përditshme.

Bashkëpunimi prej më shumë se 4 vitesh me OSBE-në dhe partnerët ndërkombëtarë sot po konkretizohet me ngritjen e kësaj qendre moderne.

Ky investim përfaqëson një hap konkret në përafrimin e Shqipërisë me standardet e Bashkimit Europian dhe praktikat më të mira ndërkombëtare, duke dhënë një kontribut të drejtpërdrejtë në luftën tonë pa kompromis kundër krimit të organizuar.

Projekti ka mundësuar forcimin e kuadrit ligjor dhe rregullator, përmes ndryshimeve dhe plotësimeve të rëndësishme në aktet nënligjore, duke sjellë:

– Përafrimin e standardit kombëtar për çaktivizimin e armëve të zjarrit me praktikat më të mira të OSBE-së dhe standardet ndërkombëtare;

– Zhvillimin e kurseve të specializuara të trajnimit dhe mbështetjen për ngritjen e strukturave për zbatimin e saktë dhe mbikëqyrjen rigoroze të të gjithë këtij procesi;

– Sigurimin e infrastrukturës dhe pajisjeve moderne të nevojshme për realizimin praktik të çaktivizimit;

– Forcimin e kapaciteteve të autoriteteve shqiptare për të monitoruar dhe garantuar standardet më të larta të sigurisë gjatë këtij procesi.

Po ashtu, projekti ka dhënë një kontribut të rëndësishëm:

– Në ndërtimin e kapaciteteve zbuluese të njësive K9, përmes sigurimit të pajisjeve dhe mjeteve trajnuese;

– Në ndërtimin e kushteve bashkëkohore për strehimin e qenve të policisë dhe Klinikës Veterinare, inaugurimi i së cilës pritet të realizohet së shpejti;

– Në trajnimin e specialistëve tanë dhe në rritjen e aftësive operacionale të Policisë së Shtetit, me një objektiv të qartë: minimizimin e rrezikut të përhapjes së armëve të vogla e të lehta dhe parandalimin e keqpërdorimit të tyre.

Dua të shpreh mirënjohjen për të gjithë partnerët që kanë mbështetur Policinë e Shtetit dhe institucionet shqiptare në këtë sipërmarrje të rëndësishme.

Policia e Shtetit mbetet plotësisht e angazhuar në luftën kundër armëmbajtjes pa leje dhe çdo forme të kriminalitetit që cenon sigurinë publike, jetën dhe shëndetin e qytetarëve.

Strukturat tona, gjatë operacioneve të dedikuara, por edhe në punën e përditshme, sekuestrojnë çdo vit mesatarisht 650 deri në 700 armë të vogla e të lehta, si dhe sasi të konsiderueshme municionesh, duke çuar përpara drejtësisë personat që i posedojnë ato në mënyrë të paligjshme.

Paralelisht, përmes strukturave tona të Policimit në Komunitet, ne vijojmë fushatat sensibilizuese, veçanërisht me të rinjtë dhe në shkolla, për të parandaluar rrezikun që sjell mbajtja e armëve, fushata këto të mbështetura fuqishëm nga OSBE-ja dhe partnerët e tjerë të Policisë së Shtetit.

Sot, përmes kësaj qendre dhe këtij partneriteti të suksesshëm, ne japim një mesazh të qartë se siguria kërkon bashkëpunim, standarde të përbashkëta dhe vendosmëri të palëkundur.

Në përfundim, dëshiroj t’i siguroj partnerët dhe donatorët tanë se Policia e Shtetit do të vijojë me profesionalizëm dhe përgjegjësi të lartë forcimin e kapaciteteve të saj në shërbim të qytetarëve.

Në aleancë të ngushtë me partnerët ndërkombëtarë, ne do të kontribuojmë maksimalisht në luftën kundër krimit të organizuar dhe kërcënimeve globale, me qëllim rritjen e parametrave të sigurisë në vend, në rajon e më gjerë.